Aqtóbede pyshaq jaraqatynan kóz jumǵan jasóspirimniń isi sotqa tústi
AQTÓBE. KAZINFORM – Aıyptalýshy stýdent ańshy pyshaǵymen qarýlanyp, bir ǵana soqqy jasaǵan. Mert bolǵan jasóspirimniń anasy keshirim bermeıtinin, qatań jaza suraıtynyn aıtty.
Aqtóbe oblystyq qylmystyq ister jónindegi mamandandyrylǵan aýdanaralyq sotynda bıyl ǵana 18 jasqa tolǵan aıyptalýshynyń isi tústi. Oǵan Qylmystyq kodekstiń «Adam óltirý» baby boıynsha aıyp taǵylyp otyr. Sotaldy tyńdaýy kezinde prokýror aıyptaý aktisin oqydy.
Іs materıalyna súıensek, bıyl naýryz aıynyń ortasynda Shalqar qalasynyń «Maıak» jáne «Rabochıı» tobynyń (qala ishindegi eki shaǵyn aýdan – red.) 2008 jáne 2010 jyly týǵan balalary arasynda kıkiljiń bolady. Sol kezde «Maıak» tobynyń balalary dene jaraqatyn alǵan. Oral qalasyndaǵy joǵary oqý oryndarynyń birinde bilim alyp júrgen aıyptalýshy muny estip, aýylyna qaıtady.
- 2026 jyly 19-naýryz kúni saǵat 20:00 shamasynda aıyptalýshy anasynyń kóligine otyryp, kompıýter klýbyna, odan keıin dúken mańyna barady. Kóligine «Maıak» tobynyń balalaryn otyrǵyzyp alady. Sodan kólikpen «Rabochıı» ataýly tobynyń balalaryn izdeıdi. Jol boıy kezdeskenderdi toqtatyp, suraıdy. Saǵat 23:00 shamasynda qala kósheleriniń birindegi úı mańynda turǵanda taǵy bir kólik aıaldaıdy. Kólikten túskender janjal shyǵarmaýdy suraǵan. Alaıda jınalyp turǵan balalar arasynda kelispeýshilik órshı bastaǵan. Aıyptalýshynyń janyna kelgen jábirlenýshi ózara sóılesedi. Odan keıin ekeýi jınalyp turǵan toptan bólek shyǵyp, kólikten 3-4 metr jerge baryp sózge kelip qalǵan. Aıyptalýshy beıbit túrde sheshpeı, ashý men yzaǵa salynyp, asa aýyr qylmys jasaýdy, adam óltirýdi, ıaǵnı basqa adamdy qasaqana qazaǵa ushyratýdy kózdep pyshaqty sol jaq keýde tusyna baǵyttap, bir ret qatty soqqy jasaǵan. Ózi oqıǵa bolǵan jerden boı tasalap, qashyp ketken. Jábirlenýshi oqıǵa ornynda kóz jumldy,- dedi prokýror.
Sot-medıtsınalyq qorytyndyǵa sáıkes Álıhan Jánibekovtiń sol jaq ókpe arterııasy zaqymdanyp, kóp qan ketken. Aıyptalýshyǵa Qylmystyq kodekstiń 99-baby 2-bóligi 9, 14 tarmaqtary boıynsha aıyp taǵylyp otyr. Qaza bolǵan jasóspirimniń anasy Raýan Júrsinqyzy óziniń keshirim bermeıtinin, zań aıasynda qatań jazalaýdy surady.
- Qylmys meniń úıimnen 500 metr qashyqta boldy. Meniń balam birinshi bolyp barady. «Rodnoı, sóıleseıik, sheshilmeıtin máselesi joq» degenine qaramaı, sózge kelmeı balamnyń keýde tusyna pyshaq suǵyp alady. Balam jan tapsyrady, al aıyptalýshy qashyp ketedi. Zań aldynda aýyr jaza alsyn. Talabym sol. Keshirim bermeımin,- dedi.
Eske salsaq, polıtsııa sol kezde janjal ishinde bolǵan barlyq kúdikti anyqtalyp, polıtsııa bólimine jetkizilgenin habarlady.
Álıhan Jánibektiń ákesi Jánibek Álımanov qala ishinde aýdan-aýdan bolyp tóbelesetinder bar ekenin aıtty. Bul oqıǵada da bir emes, bir top jasty qylmystyq jaýapqa tartý qajet dep sanady.
