Aqtóbede pyshaq jaraqatyn alǵan oqýshy aýrýhanaǵa tústi

AQTÓBE. KAZINFORM – Oqıǵa Shalqar aýdanynda boldy. Qazir kúdikti polıtsııa bólimshesinde.

Aqtóbe oblystyq polıtsııa departamenti baspasóz qyzmetiniń habarlaýynsha, qazir tergeý jumystary júrip jatyr. 

- Kúdikti tulǵa anyqtalyp, polıtsııa bólimshesine jetkizildi. Qazirgi ýaqytta bolǵan oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr. Kúdikti profılaktıkalyq esepke qoıylyp, onyń isi aýdan ákimdigi janyndaǵy komıssııada qaralatyn bolady. Budan bólek kámeletke tolmaǵan balany tárbıeleý jónindegi mindetterin tıisinshe oryndamaǵany úshin kúdiktiniń ata-analarynyń jaýapkershiligi qarastyrylady, - dep habarlady Aqtóbe oblystyq polıtsııa departamenti baspasóz qyzmeti. 

Derekterge súıensek, jábirlenýshi 14 jasta, al kúdikti 15 jastaǵy jasóspirim. Ekeýi de mektep oqýshysy. Jábirlenýshi esin biledi. 

- 26 qazan kúni Shalqar qalasynyń kámeletke tolmaǵan turǵyny pyshaq jaraqatymen aýrýhanaǵa tústi. Búginde ol Aqtóbedegi balalar aýrýhanasynda em qabyldap jatyr. Oqıǵaǵa qatysty quqyq qorǵaý organdary tergeý amaldaryn júrgizip jatyr. Bilim bólimi men quqyq qorǵaý organdary birlesip, kámeletke tolmaǵandar arasyndaǵy quqyqbuzýshylyqtardyń aldyn alý maqsatynda qosymsha profılaktıkalyq jumystardy kúsheıtti,- dep habarlady Aqtóbe oblysy ákiminiń baspasóz qyzmeti. 

Eske salsaq, buǵan deıin Mańǵystaýda bir-birin aıaýsyz urǵan qyzdardyń tóbelesi tarady. Oqıǵa Jańaózen qalasynda bolǵan. Jasóspirimder bir-birine aýyr sózder aıtyp, arty janjalǵa ulysqan.