Aqtóbede pırotehnıkany zańsyz satqandar anyqtaldy
AQTÓBE. QazAqparat – Aqtóbe oblysynda «Pırotehnıka» aldyn alý sharasy ótip jatyr. Qala turǵyny pırotehnıkany zańsyz satqany úshin aıyppul tóleıdi, dep habarlaıdy QazAqparat tilshisi.
Mereke qarsańynda polıtsııa men tótenshe jaǵdaılar qyzmeti saqtyq sharasyn kúsheıtti. Sapasyz jáne merzimi ótken ónimderdi anyqtaý maqsatynda Aqtóbe oblystyq polıtsııa departamentiniń qyzmetkerleri reıd ótkizdi. Áleýmettik jeli men arnaıy saıttardaǵy habarlamalardy tekserip, bir turǵynnyń zańsyz kásipkerlikpen aınalysqany belgili boldy.
«Órt qaýipsizdigi erejesin saqtamaı, kópqabatty úıdiń páterinde pırotehnıka satqan adamdar anyqtaldy. Pırotehnıka tárkilenip, satýshyǵa QR ÁQBtK-niń 196-baby 1-bóligi boıynsha hattama toltyryldy, aıyppul salyndy. Barlyǵy 11 derek tirkeldi. Arnaıy sertıfıkaty bolmaǵan soń 388 pırotehnıka joıyldy», - dedi oblystyq PD baspasóz qyzmetiniń jetekshisi Erbolat Sarqulov.
