Aqtóbede pırotehnıkadan jaraqat alǵandar dárigerge júgindi

AQTÓBE. KAZINFORM – Aqtóbe qalasyndaǵy kópsalaly aýrýhananyń travmatologııa bólimine kúnine 60-70 adam túsedi. Búginde pırotehnıkany durys paıdalanbaǵan eki adamdy jeńil kúıik shaldy.

Kópsalaly aýrýhananyń travmatologııa bólimine keıingi aptada 300-den astam adam júgindi. Jaraqat alǵandardyń kóbi qulap, aıaq-qolyn syndyryp alǵan, súıegi shytynap ketken.

- Birinshiden, kóktaıǵaqta qulap jatyr. Úlken kisiler qulap, súıegin syndyryp alady. Sonymen birge túrli merekelik basqosýlar sońynda jaraqat alatyndar bar. Іshimdik ishken adamdar qulap, mertigip jatady. Sóıtip kúnine 60-70 adam túsedi. Qoly, aıaǵy, jambas súıegin de syndyrady. Qart kisiler syndyryp alsa, onyń bitip ketýi, jazylýy qıyn. Úlken adamdar dalaǵa shyqqanda arnaıy aıaq kıimder kıse deımiz. Sol kezde ózin saqtaı alady. Al jastar ishimdikti kóp ishpese eken. Sebebi osyndaı merekelik basqosýlarda adam kóp túsedi. Keıde «Aqtóbede travmatologııaǵa kelmegen adam qalmaǵan shyǵar» dep aıtamyz. Jańa jyl túni emes, sol aldyn ala ótetin ujymdyq keshterde naýqas jıi ákelinedi. Adamdar bılep júrip, baspaldaqtan túsip kele jatyp qulaıdy,- dedi Aqtóbe oblystyq kópsalaly aýrýhanasynyń travmatolog dárigeri Baǵlan Rahmetov.

Onyń aıtýynsha, pırotehnıkany durys paıdalanbaǵan eki adam jeńil kúıik jaraqatymen tústi.

- Petardadan zardap shekkken 19 jastaǵy jigit tústi. Onyń qolyn kúıik shalǵan. Al ekinshisiniń beti kúıgen. Kúıik degende shashyrap, ár jerine túsken ot. Ekeýinde de birinshi dárejeli kúıik,- dedi Baǵlan Rahmetov.

Eske salsaq, Aqtóbe oblysynda 31 jeltoqsannan 1 qańtarǵa qaraǵan túni 792 aq halatty kezekshilikke shyǵady. Onyń 200-i aýdandarda.