Aqtóbede perzenthanadaǵy bala satý deregine qatysty is toqtatyldy

AQTÓBE. KAZINFORM — Polıtsııa iste qylmystyq quqyqbuzýshylyq quram joq dep tanydy. 

Qylmystyq is 2024 jyldyń 22 qarashasy kúni qozǵaldy. Bul týraly aqparat tilshilerge 2025 jyldyń qańtaryn aıynda habarlanyp, Aqtóbe oblystyq polıtsııa departamenti tergeý júrip jatqanyn málimdedi.

— Sotqa deıingi tergep-tekserý qorytyndysy negizinde jaýapqa tartylǵandardyń is-áreketterinde Qylmystyq kodekstiń 135-baby 1-bóliginde kórsetilgen (Kámeletke tolmaǵan adamdy satyp alý-satý nemese oǵan qatysty ózge de mámileler jasasý, sol sııaqty ony qanaý ne azǵyryp kóndirý, tasymaldaý, berý, jasyrý, alý, sondaı-aq qanaý maqsatynda ózge de is-áreketter jasaý) qylmystyq quqyq buzý quramy joq dep tanyldy. Soǵan sáıkes bul is Qylmystyq-protsestik kodekstiń 35-baby 1-bóligi 2-tarmaǵy boıynsha toqtatýǵa jatqyzyldy, — dep habarlady ІІM-niń baspasóz qyzmeti Kazinform tilshisiniń saýalyna.

Eske salsaq, polıtsııa perzenthanada jańa týǵan náresteni satý faktisi boıynsha qylmystyq is qozǵady. Barlyq mán-jaıdy jáne qatysy bar adamdardy anyqtaý úshin qajetti tergeý júrgizildi. 

Byltyr Memleket basshysy «Qazaqstan Respýblıkasynyń Ákimshilik quqyq buzýshylyq týraly kodeksine adam saýdasyna, vandalızm kórinisine jáne bótenniń múlkin búldirýge qarsy is-qımyl máseleleri boıynsha ózgerister men tolyqtyrýlar engizý týraly» zańǵa qol qoıdy. Sol kezde balalardy, ásirese, jańa týǵan nárestelerdi satý faktilerine tosqaýyl qoıý úshin Ákimshilik quqyq buzýshylyq týraly kodeks jańa bappen tolyqtyryldy.