Aqtóbede perzenthana dárigeri vırýs juqtyrdy degen kúdikpen aýrýhanaǵa jatqyzyldy
AQTÓBE. QazAqparat – Sońǵy táýlikte Aqtóbede taǵy 6 adamnan koronavırýs ınfektsııasy anyqtaldy. Perzenthana dárigeri indetke shaldyqty degen kúdikpen aýrýhanaǵa jatqyzyldy, dep habarlaıdy QazAqparat tilshisi.
Aqtóbe oblysy boıynsha 349 adamda koronavırýs ınfektsııasy tirkelse, onyń 277-i úıine shyǵaryldy. Ózgesi em alyp jatyr.
«Búgingi kúnge deıin 34 bala indetke shaldyqsa, onyń 25-i jazylyp shyqty. Infektsııalyq statsıonarda 9 bala bar. Іndet juqtyrǵan eresekterdiń beseýi - jansaqtaý bóliminde bolsa, onyń ekeýi jasandy tynys alý apparatyna qosylǵan», - dedi oblystyq densaýlyq saqtaý basqarmasynyń basshysy Áset Qalıev.
Sońǵy tirkelgen derek boıynsha taǵy 6 adamnan vırýs anyqtaldy. Qazir perzenthana dárigeri de vırýs juqtyrdy degen kúdikpen aýrýhanaǵa jetkizilgen.
«Oblystyq perınataldyq ortalyq dárigeri vırýs juqtyrdy dep kúmándanyp otyrmyz. Ol aýrýhanaǵa jatqyzylyp, baqylaýǵa alyndy. Janynda bolǵan adamdar úıinde karantınde jatyr. Qazir kez kelgen aýrýhana karantın rejıminde jumys isteıdi. Jalpy óńirde 15 myńnan astam medıtsına qyzmetkeri bar bolsa, onyń 14 myńnan astamy synama tapsyryp, tekserildi», - dedi basqarma basshysy.
