Aqtóbede páter kezeginde turǵan jetim balalar baspanaly boldy

Búgin Aqtóbede «Baqytty bala - Máńgilik eldiń kepili» atty uranymen qaıyrymdylyq kontserti ótti. Buǵan deıin habarlaǵanymyzdaı, bıyl Aqtóbede «Baqytty bala» jobasy iske asyrylady. Ár bala bul jyly qamqorlyqqa alynyp, qalada aýla klýbtary salynady. Al aýyldarda sport alańdary paıdalanýǵa beriledi. Búgingi shara kezinde oblys ákimi Berdibek Saparbaev balalardy qamqorlyqqa alyp, olardyń jaqsy ómir súrýine jaǵdaı jasaýǵa shaqyrdy.

 

«Balalar baqytty bolýy kerek. Bizdiń mindetimiz - balanyń júzinnen kúlki, júreginen qýanysh ketpeıtin ómir syılaý. Memleket basshysy Nursultan Nazarbaevtyń tapsyrmasyna sáıkes, elimizde «Rýhanı jańǵyrý» baǵdarlamasy iske asyrylyp jatyr. Biz «Baqytty bala» jylyn jarııaladyq. Aqtóbe balalarynyń sport, bilim, mádenıet, ónermen shuǵyldanýyna jaǵdaı jasaımyz. Kásipkerler, sharýa qojalyqtary, azamattar qoldap jatyr. Ásirese, ata-anasyz qalǵan balalar qurdastarynan artta qalǵanyn sezinbeýi kerek. Óńirde 1 myńǵa jýyq ata-anasyz ósip kele jatqan bala bar. Olarǵa qamqorshy, demeýshi tabý bizdiń mindetimiz»,- óńir basshysy Berdibek Saparbaev.

 

Óz sózinde oblys ákimi múmkindiginshe sábıler úıin jabý jolyn qarastyrýdy usyndy. Qazirgi kezde balalar úıiniń tárbıelenýshileri úshin «Meıirim» úıi jumys istep tur. Munda mektep bitirip, orta, joǵary oqý oryndaryna túsken, jumysyn endi bastaǵan jastar ómirge beıimdeledi.

 

Keıin Ásel Orazbaeva, Medet Mahambetov jáne Larısa Zaharovaǵa páter kiltin tabys etti. Olar uzaq jyl kezek kútip, tegin baspanaǵa ıe boldy.

 

«Balalar úıinen shyqqan soń kásiptik-tehnıkalyq lıtseıde bilim aldym. Jol qozǵalysyn baqylaıtyn mamandyqty ıelengenimmen basqa salada jumys isteýge týra keldi. Qazir munaı kompanııasynyń birinde slesar bolyp jumys isteımin. Buǵan deıin men apammen bir úıde turdym. Al búgin ózime 1 bólmeli páter berdi. Men 10 jyl boıy kezek kútip, osy kúnge jettim»,- dedi páter ıesi Medet Mahambetov.