Aqtóbede páter ıeleri kooperatıvi toqtap turǵan lıftti aýystyrýǵa jarna jınaı bastady
AQTÓBE. QazAqparat - Aqtóbe qalalyq turǵyn úı ınspektsııasy toqtap turǵyn lıftterdi aýystyrý úshin turǵyndarmen kezdesý ótkizdi. Páter ıeleri kooperatıvi jarna jınaýdy bastady, dep habarlaıdy QazAqparat tilshisi.
Aqtóbe qalasyndaǵy qaıǵyly oqıǵadan keıin lıftter túgel tekserilip, 22 lıft apatty jaǵdaıda toqtatylǵan bolatyn.
Búgin Aqtóbe qalalyq turǵyn úı ınspektsııasy 13 kópqabatty turǵyn úıdiń turǵyndarymen kezdesip, lıft aýystyrýdyń tártibin túsindirdi.
«Turǵyndardyń jalpy jınalysynda lıft qondyrǵysyn jańǵyrtý jóninde sheshim qabyldanyp, hattama toltyryldy. «Tabys Aqtóbe» JShS-niń qyzmetkerleri 13 úıdiń turǵyndarymen qaıta kezdesý ótkizip, erejeni tolyq túsindirdi. ıAǵnı, turǵyn úı qoryn kútip ustaý erejesine sáıkes, lıftti jańǵyrtý páter ıeleriniń mindeti. Jarna jınaý, arnaıy esepshot ashý, jobalyq-smetalyq qujattar daıyndaý tolyq atqarylǵan soń jóndeý jumystarynyń shyǵyny bıýdjet esebinen qarastyrylady. Aqtóbe qalasyndaǵy 12 shaǵyn aýdanda ornalasqan №41 kópqabatty turǵyn úıdiń aýlasynda lıftti aýystyrý jóninde jınalys ótti. Jınalys qorytyndysy boıynsha páter ıeleri jarna jınaý jumystaryn bastap ketti»,- dep habarlady Aqtóbe qalasy ákiminiń baspasóz qyzmeti.
Aıta keteıik, negizi Aqtóbede 776 lıft bar. Tekserý kezinde 25 jyldan beri jumys istep turǵan lıftter tizimge alyndy. Barlyǵy 139 kópqabatty turǵyn úıdegi 282 lıft tekserildi. Kóp zańsyzdyq anyqtaldy. Máselen, tekserilgen lıftiniń tek 18-de ǵana júrýge jaramdylyǵyn rastaıtyn tehnıkalyq qujaty bar. Al 113 lıftiniń tehnıkalyq tólqujaty bolmaı shyqty. Qazirgi kezde 56 lıftiniń ıesi joq, ony qaraýdy eshkim óz mindetine almaǵan. Barlyǵy 149 lıftini jóndeý qajet bolyp tur. Bir lıft jóndeýge de kelmeıdi. Al 22 lıft apatty jaǵdaıda toqtatyldy.
