Aqtóbede páter almaq bolǵan 59 adam alaıaqtarǵa aldanyp qaldy
AQTÓBE. KAZINFORM – Sottalýshylar «Samruk-Kazyna Construction» AQ arqyly páter alýǵa kómektesetinin aıtyp sendirgen. Barlyǵy 59 aqtóbelik 160 mln teńge aqshasynan aıyryldy.
Aqtóbe qalalyq sotynda M.Іzbasarova, A.Qadralıeva, B.Ótebaeva jáne A.Takenovaǵa qatysty qylmystyq is qaraldy. Olarǵa Qylmystyq kodekstiń «Alaıaqtyq» baby boıynsha aıyp taǵyldy. Sottalýshylardyń bári de buǵan deıin alaıaqtyǵy úshin sottalǵan, raqymshylyqqa iligip, jazasynyń bir bóligi qysqartylǵan. Sonymen birge kámelet jasqa tolmaǵan balalary bolǵan soń jazasyn óteý merzimi 3 jylǵa keıinge shegerilgen.
Іs materıalyna súıensek, sottalýshylar «Samruk-Kazyna Construction» AQ-y arqyly páter alýǵa kómektesetinin aıtady. Ol qyzmeti úshin keıbirinen 400 000 teńge alsa, keıbiriniń shyǵyny 14 000 000 teńgeden asty. Osylaısha 59 aqtóbelik 160 mln teńge aqshasynan aıyryldy.
Sot úkimimen sottalýshy M.Іzbasarova, A.Qadralıeva, B.Ótebaeva jáne A.Takenova Qylmystyq kodekstiń «Alaıaqtyq» baby boıynsha aıypty dep tanylyp, 4 jyl 8 aıǵa bas bostandyǵynan aıyryldy. Sýdıa «Raqymshylyq týraly» Zańyna súıenip jaza merzimin 3 jyl 6 aıǵa qysqartty. Qylmystyq kodekstiń 74-babyna 1-bóligine sáıkes sottalýshy M.Іzbasarova, A.Qadralıevanyń jazany óteý merzimi 3 jylǵa keıinge shegerildi. Al A.Takenova jazasyn 2 jyldan keıin óteıdi. Sot kámelet jasqa tolmaǵan balalary bar ekenin, sondyqtan jaza óteý merzimi keıingi shegeriletinin aıtty. Sottalýshy B.Ótebaeva sot zalynan qamaýǵa alyndy.
Jábirlenýshilerdiń azamattyq talap aryzy ishinara qanaǵattantyryldy. Sot úkimi zańdy kúshine engen soń sottalýshylar jábirlenýshilerdiń aqshasyn qaıtarýy tıis.
Aıta keteıik, Astana qalasynyń Qylmystyq ister jónindegi aýdanaralyq soty zamanaýı telekommýnıkatsııalyq tehnologııalardy paıdalanyp, alaıaqtyq qońyraýlar uıymdastyrǵan transulttyq qylmystyq toptyń 24 múshesin kináli dep tanydy. Sot árqaısysyna 8 jylǵa bas bostandyǵynan aıyrý jazasyn taǵaıyndady.
