Aqtóbede «Parasat joly» ortalyǵy ashyldy

NUR-SULTAN. QazAqparat - Aǵymdaǵy jyldyń 12 naýryzynda oblysymyzǵa jumys saparymen kelgen Sybaılas jemqorlyqqa qarsy qyzmet tóraǵasynyń keńesshisi Jazıra Jylqyshıeva jáne «Parasat joly» respýblıkalyq ortalyǵynyń basshysy Sádibek Túgel Q. Jubanov atyndaǵy Aqtóbe óńirlik ýnıversıtetiniń professorlyq-oqytýshylyq quramymen, ǵylymı keńes ókilderimen kezdesti, dep habarlaıdy QazAqparat.

Shara sybaılas jemqorlyqqa qarsy mádenıet qalyptastyrý salasynda tyń joba bolyp tabylatyn «Parasat joly» ortalyǵyn ýnıversıtet qabyrǵasynda ashýǵa baǵyttalǵan.

Esterińizge sala ketsek, aqpan aıynyń basynda Agenttik pen Mádenıet jáne sport mınıstrliginiń birinshi basshylarymen memorandýmǵa qol qoıylyp, zııaly qaýym ókilderiniń basyn qosqan «Parasat joly» jobasynyń tusaýy kesilgen bolatyn.

Atalǵan joba qoǵam arasynda sybaılas jemqorlyqqa qarsy mádenıet qalyptastyrýǵa, halyqtyń ádebı, mádenı jáne shyǵarmashylyq qundylyqtaryn paıdalana otyryp parasattylyq pen adaldyq qaǵıdattaryn ilgeriletýge baǵyttalǵan.

Búgingi kúnniń ózinde, Aqtóbe oblysyndaǵy 233 memlekettik kitaphanada joba ortalyǵy uıymdastyrylyp, óz jumysyn bastap ketken.

Sonymen qatar, búgingi kúni «Parasat joly» jobasyna batys óńirindegi iri joǵarǵy oqý oryndarynyń biri bolyp tabylatyn Q. Jubanov atyndaǵy Aqtóbe óńirlik ýnıversıteti de ún qosyp otyr.

Aldaǵy ýaqytta, atalǵan ortalyqta sybaılas jemqorlyqqa qarsy aqparattyq-aǵartýshylyq shtab, jazýshylar, aqyndar, ǵylym men bilim qaıratkerleriniń, belsendi qoǵam músheleriniń qatysýymen kóptegen sharalar ótkiziletin bolady.