Aqtóbede para úshin aıyptalǵan basshy sot otyrysynda ákimge aqsha bergenin aıtty
AQTÓBE. KAZINFORM — Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasova sot otyrysynda jaýap berdi. Ol qurbysynyń shotyna túsken aqshany ákimge óz qolymen bergenin aıtty.
Aýdandyq sotta Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasovaǵa qatysty is qaralyp jatyr. Qylmystyq kodekstiń 366-baby 3-bóliginiń 1,4-tarmaqtarymen aıyptalyp jatqan bólim basshysy sotta jaýap berdi. Ol Kópmola, Jylan, Keńdala aýyldarynyń sý jelilerin qaıta jańǵyrtý jobasyna jaýapty «Dáneker» JShS-nen túsken qarjyny Qarashoqat mektebiniń qurylysyn aıaqtaýǵa bergen demeýshi aqshasy ekenin, kelisimdi Shalqar aýdanynyń ákimi Janbolat Jıdehanovtyń ózi júrgizgenin aıtty.
— Mektep qurylysyna 25 mln teńge suraǵan. Biraq 15 mln teńgege kelisti degen áńgime bolǵan. 2024 jyldyń qazan aıynda J.Jıdehanov (aýdan ákimi — red.) meni kabınetine shaqyryp alyp, aqsha túsýi kerek ekenin aıtty. Sony shuǵyl ákelip berýdi surady. Men demeýshige óz qyzmetkerimniń nómirin berip, aqshany sodan almaq boldym. Biraq aqsha birden túspedi. Sonyń arasynda Jıdehanov maǵan qaıta-qaıta habarlasty. Ol 700 myń teńgege jýyq aqsha túsetinin aıtqan soń úıden ózimniń qarjymdy alyp, aparyp berdim. Sol kezde qalaı alǵanymdy surady. Qyzmetkerdiń telefon nómirin bergenimdi estigende ashýlandy. Odan keıin memlekettik qyzmette joq basqa bir senimdi adam kerek dep aıtty. Syrttan, qaladan surady. «Týma-týystan aqsha túsýi kerek, senimdi adamdar taýyp, maǵan ákelip ber» dedi. Men ózimniń qurbym bar ekenin, Aqtóbede turatynyn, memlekettik qyzmette istemeıtinin aıttym. Sol jerde telefon nómirin jazyp berdim, — dedi sottalýshy sot otyrysynda.
Keıin qurbysynyń esepshotyna birneshe adamnan 5 mln teńge aqsha túsedi. Biraq aqsha sol kúıi saqtaldy, eshkim almaǵan.
Al ekinshi epızod «AzııaStroıProekt777» JShS-ne qatysty boldy. Bul eki qabatty turǵyn úıge qajetti ınjenerlik jelilerdi tartýy tıis kompanııa. Bas merdiger qosalqy merdiger jaldaǵan. Merdigermen taǵy da Shalqar aýdanynyń ákimi Janbolat Jıdehanov sóıleskenin, sodan keıin ártúrli nómirden 2 350 000 teńge túskenin aıtty. Esepshotqa túsken qarjyny qolma-qol alý qıyn bolǵan soń sottalýshy Sh. Sádýaqasova taǵy da óz qarjysyn alyp, úıiniń janyna kóligimen kelgen aýdan ákimine bergenin aıtty. Sodan keıin taǵy da 5 700 000 teńge túsedi. Sóıtip barlyǵy 12 500 000 teńge túsip, sottalýshy Aqtóbe qalasyna kelgende qurbysynan 7 500 000 teńgeni qolma-qol alady. Sol kúni sottalýshy Sh. Sádýaqasova Antıkor qyzmetkerlerine ustalady.
— «Aqshany aldym, ákelip berýge daıynmyn» dedim. 6 500 000 teńgeni Antıkorǵa berdim. 1 mln teńge meniń sómkemde boldy. Ony aıtpadym. Sómkeniń qaıda qalǵanyn bilmedim. Qolymda paketim, sómke boldy. Aqsha túskenin moıyndaımyn, biraq asyra paıdalanýdy moıyndamaımyn. Qorqytty, úrkitti degenge kelispeımin, ondaı bolmady. Aýdan ákimi J.Jıdehanov qyzmetkeriniń telefon nómirinen habarlasty, «qoryqpa, eshteńe aıtpa, ol jaqtaǵylar ártúrli nárse aıtyp aljastyra beredi. Ózim dep aıta ber, artyńnan adam alyp ketpe. Ózim alyp shyǵamyn, eshteńe aıtpa» dedi. Antıkorǵa aryz jazyp, osy kisiniń aqsha alǵanyn, sol kisiniń tapsyrmasy ekenin aıttym. Jasyryn tergeý de júrdi, — dedi sottalýshy.
Shuǵa Sádýaqasovanyń qorǵaýshysy sot otyrysynda aýdıo, vıdeo tyńdalym júrgenin, biraq vıdeo qondyrǵy ornatý kezinde ákim kabınetinde onyń qoraby qalyp qoıǵanyn aıtty. Jáne sot otyrysynda kýá aýdan ákimi Janbolat Jıdehanovtan jaýap alýdy surady. Alaıda sot ótinishti qanaǵattandyrmady.
Aıta keteıik, Shuǵa Sádýaqasovaǵa Qylmystyq kodekstiń 366-baby 3-bóliginiń 1,4-tarmaqtarymen aıyp taǵylyp jatyr. Eger kánisi dáleldense múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrylady. Sondaı-aq paranyń 60 eselengennen 70 eselengenge deıingi somasy mólsherinde aıyppul salý nemese 7 jyldan 12 jylǵa deıingi merzimge bas bostandyǵynan aıyrý jazasy kútip tur.