Aqtóbede para bergen mektep dırektorlaryna sot úkimi shyqty

AQTÓBE. KAZINFORM - Aqtóbe oblysynyń bilim salasynda sapany qamtamasyz etý departamenti bóliminiń basshysy para alǵany úshin aıyppul tóleıdi. Oǵan para bergen eki mekteptiń dırektory jazalandy.

№ 2 Aqtóbe qalalyq sotynda Qylmystyq kodekstiń «Para alý», «Para berý», «Paraqorlyqqa deldal bolý» baptary boıynsha is qaralyp, búgin keshkilik úkim shyqty.

- Asqar Kemeshov Qylmystyq kodekstiń 366-baby 3-bóligi 4-tarmaǵymen kináli dep tanylyp, paranyń 60 eselengen somasyn, ıaǵnı, 7 000 200 teńgeni quraıtyn aıyppul taǵaıyndalsyn. Gýlzat Baktarbaeva Qylmystyq kodekstiń 367-baby 1-bóligimen kináli dep tanylyp, paranyń 15 eselengen somasy, ıaǵnı, 1 050 000 teńge bolatyn aıyppul taǵaıyndalsyn. Altyngúl Tólegenova Qylmystyq kodekstiń 367-baby 1-bóligimen kináli dep tanylyp, paranyń 15 eselengen somasy, ıaǵnı, 750 000 teńge bolatyn aıyppul taǵaıyndalsyn. Almagúl Beknııazova Qylmystyq 368-babynyń 1-bóligimen aıypty dep tanylyp, paranyń 10 eselengen somasy, ıaǵnı, 500 000 tg mólsherinde aıyppul taǵaıyndalsyn, - dedi sýdıa.

Sonymen birge sottalýshylar endi memlekettik, sýdıa, jergilikti ózin-ózi basqarý organdarynda, QR Ulttyq bank jáne onyń vedomstvolarynda, qarjy naryǵy men qarjy uıymdaryn retteý, baqylaý, qadaǵalaý jónindegi ýákiletti organda, memlekettik organda jáne kvazımemlekettik sektor sýbektilerinde laýazymdy qyzmet atqara almaıdy.

Aıta keteıik, Aqtóbede bilim salasynyń jemqorlyqpen aınalysqan qyzmetkerleri sotta sońǵy sózin aıtty. Sottalýshylardyń úsheýi óz isine ókinip, bas bostandyǵynan aıyrmaýdy surady. Al bireýi qysym kórgenin, májbúr bolǵanyn aıtty.