Aqtóbede para alýdan bas tartqan polıtseı marapattaldy

AQTÓBE. QazAqparat – Aqtóbede patrýldik polıtsııa qyzmetkeri ishimdik iship, rýlge otyrǵan júrgizýshige aıyppul salǵan. Al júrgizýshi polıtsııa qyzmetkerine syılyq berip, jazadan qutylmaq bolǵan, dep habarlaıdy QazAqparat tilshisi.

Aqtóbedegi sybaılas jemqorlyqqa qarsy is-qımyl agenttiginiń oblystyq departament basshysy Mırlan Muhambetov syılyq bergen adam týraly habar bergen polıtsııa qyzmetkeri Áset Zaınýllındi marapattady. Alǵys hat alǵan polıtsııa qyzmetkeri buǵan deıin «Lexus» kóligin toqtatyp, ishimdik ishken júrgizýshige aıyppul salǵan. Sol kezde Ákimshilik quqyqbuzýshylyq kodekstiń 608 - baby, 1 – bóligimen ákimshilik hattama toltyrǵan. Biraq júrgizýshi polıtsııa qyzmetkeriniń telefonyn taýyp alyp, oǵan óz alǵysyn jazyp, 5 myń teńge salyp jibergen. Aqsha aýdarymyn rastaıtyn qaǵazdyń sýretin qosa berdi.

«Polıtsııa qyzmetkeri Áset Zaınýllın bul habarlama men aýdarylǵan aqsha týraly oblystyq polıtsııa departamentiniń ózindik qaýipsizdik basqarmasyna aıtty. Bul onyń óziniń jumysyna adal, antyna berik ekenin kórsetedi.Qazirgi ýaqytta zań buzyp, syılyq bergen júrgizýshige 200 AEK, ıaǵnı, 505 myń teńge aıyppul salyndy», - dep habarlady Sybaılas jemqorlyqqa qarsy is-qımyl agenttiktiń oblystyq departamenti.