Aqtóbede para alǵan sheneýnikter sottaldy

AQTÓBE. KAZINFORM – Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 6 jylǵa bas bostandyǵynan aıyryldy. Ekeýi de alǵan aqshasyn keri qaıtarady.

Shalqar aýdandyq sotynda aýdan ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaevqa úkim shyqty. Sot úkimimen Altynbaı Berkimbaev Qylmystyq kodekstiń 366 babynyń 3 bóligi 1, 2, 4 tarmaqtarymen («Para alý» baby) kináli dep tanyldy. Odan memleket paıdasyna 1,5 mln teńge tárkilenip, 6 jyl merzimge bas bostandyǵanan aıyryldy.

Al Bekturǵan Zaırymbet Qylmystyq kodekstiń 366 babynyń 3 bóligi 1, 2 tarmaqtarymen («Para alý» baby) kináli dep tanyldy. Odan memleket paıdasyna 1 mln teńge tárkilendi jáne 6 jyl merzimge bas bostandyǵanan aıyryldy. Ekeýi de endi memlekettik qyzmette, qarjy sektorynda, kvazımemlekettik sektor sýbektilerinde laýazymdy qyzmetterdi atqara almaıdy. Jazany qylmystyq atqarý júıesiniń ortasha qaýipsiz mekemesinde óteý belgilendi.

Buǵan deıin habarlaǵanymyzdaı, aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Altynbaı Berkimbaev jol salǵan qosalqy merdiger mekeme basshysymen kezdesip, oryndalǵan jumys jónindegi aktini esh kedergisiz qabyldaý úshin 200 myń teńge talap etken. Taǵy bir epızodta Shalqar aýdany ákiminiń orynbasary Bekturǵan Zaırambet ekeýi káriz júıesine jaýapty merdigerden memlekettik satyp alý konkýrsyndaǵy somanyń 1%-yn suraıdy. Іs Shalqar aýdandyq sotynda qysqartylǵan tártipte qaraldy. Sottalýshylar kinány moıyndap, protsestik kelisimge keletinin aıtty.