Aqtóbede para alǵan polıtsııa qyzmetkerleri sottaldy
AQTÓBE. KAZINFORM — Ekeýi de temirjoldaǵy tártipke jaýapty bolǵan. Biri 102 500 teńge, ekinshisi 37 500 teńge para alyp, aıyppul arqalady.
Aqtóbe qalalyq sotynda Aqtóbe stantsııasynda jelilik polıtsııa bólimi patrýldik polıtsııa vzvodynyń polıtseılerine qatysty is qaraldy. Ekeýine de Qylmystyq kodekstiń «Para alý» baby boıynsha aıyp taǵyldy. Sottalýshylar sońǵy sózinde aıypty tolyq moıyndap, bas bostandyǵynan aıyrmaýdy surady. Sot úkimimen 22 jáne 23 jastaǵy polıtsııa qyzmetkerleri aıypty dep tanyldy.
— B.Alpamys Qylmystyq kodekstiń 366-baby 3-bóligi 1,2,4 tarmaqtary boıynsha kináli dep tanylyp, paranyń 35 eselengen somasy mólsherinde, ıaǵnı 4 900 000 teńge aıyppul jazasyna tartylsyn. Á. Rollan aıypty dep tanylyp, paranyń 35 eselengen somasy mólsherinde, ıaǵnı, 2 625 000 teńge aıyppul jazasyna tartylsyn, — dedi sýdıa Aıan Kýsaev.
Eki sottalýshy da ómiriniń sońyna deıin memlekettik, jergilikti ózin-ózi basqarý organdarynda jumys isteı almaıdy. Al aıyppuldy sot úkimi zańdy kúshine engen kúni, ıaǵnı 15 táýlikte tóleýi tıis. Sonymen birge memleket paıdasyna para somasyn, biri 102 500 teńge, ekinshisi 37 500 teńge tóleýi kerek. Sot anyqtalǵan buzýshylyq boıynsha tıisti shara qabyldaý úshin QR ІІM Kóliktegi polıtsııa departamentiniń basshylyǵyna jekeshe qaýly shyǵardy.
Aıta keteıik, Aqtóbe qalasy ákimi apparatynyń burynǵy basshysy bas bostandyǵynan aıyryldy. Sottalýshy Nursultan Isembaıuly Qylmystyq kodekstiń «Alaıaqtyq» baby boıynsha aıypty dep tanyldy.
