Aqtóbede para alǵan memlekettik kirister departamentiniń qyzmetkeri 67 mln teńge aıyppul tóleıdi
AQTÓBE. KAZINFORM – Oblystyq memlekettik kirister departamenti basqarmasynyń bas mamany 3 mln teńge para alǵan. Sotta kinási dáleldenip, paranyń 22,5 eselengen túrindegi aıyppul salyndy.
Aqtóbe qalalyq sotynda oblystyq memlekettik kirister departamenti basqarmasynyń bas mamanyna qatysty is qaraldy. Oǵan Qylmystyq kodekstiń «Para alý» baby boıynsha aıyp taǵyldy. №2 Aqtóbe qalalyq soty baspasóz qyzmetiniń habarlaýynsha, sottalýshy WharsApp qosymshasy arqyly kásipkerge habarlama jazady. Onda kameraldyq kedendik tekserýdi toqtatýǵa jáne oń sheshimin shyǵarýǵa kómektesetini, qyzmeti úshin 3 mln teńge alatyny týraly aıtqan. Kásipker bul týraly UQK oblystyq departamentine habarlaıdy. Sol aralyqta oblystyq memlekettik kirister departamenti basqarmasynyń bas mamany ýaqytty belgileıdi. 2025 jyldyń jeltoqsan aıynda jábirlenýshi 1 mln teńgeni alyp, kelisimmen departament aýlasynda turǵan kólik ishinde qaldyrady. Arada bir kún ótkennen keıin dámhana janynda kezdesip, kólik ishinde 2 mln teńgeni alyp jatqan jerinen ustaldy.
Sot otyrysynda sottalýshy ózine taǵylǵan aıypty tolyq moıyndady. Sot úkimimen sottalýshy Qylmystyq kodekstiń 24-baby 3-bóligimen, 366-baby 2-bóligimen aıypty dep tanylyp, para somasynyń 22,5 eselengen mólsherinde, ıaǵnı, 67 500 000 teńge aıyppul salyndy. Sot sottalýshynyń qamaýda otyrǵan kúnderin eseptep, aıyppul somasyn 67 105 244 teńge qysqartty. Sottalýshy ómir boıy memlekettik qyzmette, qarjy salasynda jumys isteı almaıdy. Sot úkimi zańdy kúshine engen joq.
Aıta keteıik, Aqtóbede para alǵan mektep dırektory sottaldy. Ol 250 myń teńge para alǵan. Oǵan 7,5 mln teńge aıyppul salyndy.