Aqtóbede ózinen kishi balany urǵan mektep oqýshysyna sotta aıyp taǵyldy
AQTÓBE. KAZINFORM – Sot isti jabyq qaraýǵa sheshim qabyldady. Mektep oqýshysyna Qylmystyq kodekstiń «Densaýlyqqa qasaqana aýyrlyǵy ortasha zııan keltirý» baby boıynsha aıyp taǵylyp jatyr.
Aqtóbe oblystyq kámeletke tolmaǵandardyń isteri jónindegi mamandandyrylǵan aýdanaralyq sotyna mektep oqýshylarynyń isi tústi. Sot ashyq bolǵanymen, sýdıa sot salyndaǵy jábirlenýshi men aıyptalýshynyń kámeletke tolmaǵanyn eskerip, jabyq qaraýǵa sheshim qabyldady. Jábirlenýshi Aısultan Kárim anasymen, qorǵaýshysymen birge sotqa qatysady.
- Qazigi tańda balany taǵy da otaǵa daıyndap jatyrmyz. Qolyna temir salyndy, endi sony alady. Túnde uıyqtamaıdy, syrqyraıdy. Balam áli de sol kúndi umytpady. Ony mektepte kórse qorqady, shoshıdy. Men sottalýshynyń laıyqty jazasyn alǵanyn qalaımyn. Sonymen birge oblystyq bilim basqarmasynan sottalýshynyń synyp jetekshisiniń jumys ornyn bosatýyn talap etemin. Meniń balamnyń qoly synyp, aýrýhanaǵa túskende baryp, qorqytqan,- dedi Aqjan Kárim.
Eske salsaq, Aqtóbe qalasynyń turǵyny Aqjan Kárim balasyn joǵary synyp oqýshysy uryp, tipti qol súıegin syndyryp jibergeni týraly aıtty. Oqıǵa 6 qazan kúni mektep aýlasyndaǵy fýtbol alańynda bolǵan. 5-synyp oqýshysy Aısultan Kárim tústen keıin sabaqtan shyǵyp, oınaýǵa barady. Sol kezde 10-synyp oqýshysy olarǵa dereý alańnan shyǵýdy buıyrady. Alaıda balalar oıyndy ári qaraı jalǵastyryp, joǵary synyp oqýshysy kelgen sátte birin ıterip, keıin ıyǵy men aıaǵynan tebedi.
