Aqtóbede ózin basynan atqan áskerı qyzmetker aman-esen aýrýhanadan shyqty
AQTÓBE. QazAqparat - Aqtóbedegi Ulttyq qaýipsizdik komıteti shekara qyzmetiniń 2030 áskerı bóliminde aqpan aıynda tótenshe jaǵdaı tirkelgen bolatyn. 32 jastaǵy áskerı qyzmetker ózin basynan atyp, aýrýhanaǵa tústi. Dárigerler birneshe otadan soń naýqastyń aman-esen aýrýhanadan shyqqanyn aıtty, dep habarlaıdy QazAqparat tilshisi.
«Áskerı qyzmetker aman-esen esin jınap, aýrýhanadan shyǵaryldy. Óte aýyr otalar jasaldy. Tamaq astynan tıgen oq bas súıeginen shyqqan. Muryn, aýyz qýystaryna qatty zaqym keldi. Tańdaıy joq. Oǵan jasandy tańdaı salý kerek. Otany biz jasaı almaımyz. Ondaı ota bizde jasalǵan joq, jasalmaıdy», - dedi oblystyq jedel járdem aýrýhanasynyń bas dárigeri Raqymjan Arystan. Onyń aıtýynsha, nasqaý aýrýhanadan shyǵarylǵan soń Astanadaǵy áskerı gospıtalge ońaltý úshin jiberilgen.
«Áskerı qyzmetker sóıleıdi, aıtylyp jatqan sózdi túsinedi. Tamaq ishedi, esin biledi. Aqyl-esi durys. Ózgesi bizdiń quzyretimizde emes», - dedi R. Arystan.
Eske salsaq, 8 aqpan kúni Aqtóbedegi Ulttyq qaýipsizdik komıteti shekara qyzmetiniń 2030 áskerı bóliminiń qyzmetkeri ózin basynan atyp, aýrýhanaǵa túsken bolatyn. Dárigerler birneshe ota jasap, naýqas uzaq ýaqyt em qabyldady. Buǵan deıin habarlaǵanymyzdaı , áskerı qyzmetker atý jattyǵýlaryna josparly daıyndyq kezinde ózine oq atqan.
