Aqtóbede ózenge qulap ketken balanyń denesi 20 kúnnen soń tabyldy
AQTÓBE. KAZINFORM — Tótenshe jaǵdaılar qyzmeti 10 jastaǵy Mansur Samatovtyń denesin Elek ózeninen alyp shyqty. Bala 1,5 metr tereńdikten tabyldy.
Aqtóbe oblystyq TJD baspasóz qyzmetiniń habarlaýynsha, súńgýirler 2016 jyly týǵan balanyń denesin búgin tapty. Elek ózeni jaǵasynan shamamen 3 metr qashyqtyqtan, 1,5 metr tereńdikten alyp shyqty. Bul Saryjar aýylynan shamamen 14 shaqyrym qashyq jer.
— Alǵashqy saǵattardan bastap TJM avıatsııasy jumyldyrylyp, úlken aýmaqtardy jedel tekserýge múmkindik boldy. Súńgýirler kún saıyn 30–35 km aýmaqty qarap shyqty. Al júzý quraldary arqyly 25–30 shaqyrymdy qamtydy. Drondarmen qarady, — dedi Aqtóbe oblystyq TJD baspasóz qyzmeti.
Eske salsaq, Aqtóbede joǵalǵan balany izdeý jumystary shekara aýmaǵynda da júrdi. Sebebi Elek ózeni Reseıdiń Orynbor oblysy aýmaǵyna qaraı aǵady. Sondyqtan tótenshe jaǵdaılar qyzmeti kórshiles áriptesterine de habar berdi.
Budan buryn 29 naýryz kúni keshkilik Martók aýdandyq polıtsııa bóliminiń kezekshi bólimine 2016 jyly týǵan balanyń joǵalǵany týraly habarlama túskenin jazǵanbyz.
