Aqtóbede ózenge qoı sýarýǵa barǵan jasóspirim sýǵa batyp ketti

AQTÓBE. KAZINFORM – Oqıǵa Temir aýdany Shubarqudyq aýyly mańynda boldy. Tótenshe jaǵdaılar qyzmeti ata-analardy saq bolýǵa shaqyrdy.

Temir aýdany Shubarqudyq kenti mańyndaǵy Oıyl ózeninde qaıǵyly jaǵdaı boldy. Jasóspirim mal sýarýǵa baryp, artynsha ózi de sýǵa túsken. 

- 2009 jyly týǵan jasóspirim otbasymen birge mal sýarýǵa shyqqan bolatyn. Sol sátte jasóspirim qoıdyń artynan sýǵa kirip, batyp ketken. Bul oqıǵa sý aıdyndaryndaǵy qaýipsizdik erejelerin saqtaýdyń jáne balalarǵa júzýdi úıretýdiń qanshalyqty mańyzdy ekenin taǵy bir márte dáleldep otyr. Osyndaı qaıǵyly jaǵdaılardyń aldyn alý úshin ata-analar men aýyl turǵyndary qaýipsizdik talaptaryn qatań saqtap, balalardyń ómiri men qaýipsizdigin árdaıym basty nazarda ustaýy qajet, - dep habarlady oblystyq TJD baspasóz qyzmeti.

Eske salsaq, mamyr aıynda Shalqar kólinen mektep oqýshysynyń denesi tabyldy. Ol tyıym salynǵan jerde sýǵa shomylǵan.

Sonymen birge Aqtóbe qalasyndaǵy Elek ózeni boıynda ornalasqan demalys oryndarynyń birinde qaıǵyly jaǵdaı tirkeldi. 4 jasar balanyń denesin súńgýirler 2 metr tereńdikten alyp shyqty.