Aqtóbede ózenderdi tazartýǵa baılanysty jeti qylmystyq is qozǵaldy
«Aqtóbe qalasyndaǵy ózenderdi tereńdetý, tazartý jumystaryna baılanysty tekserý júrip, ekologııalyq zańnamany buzý faktisi anyqtaldy. Qazir sotqa deıingi tergeý júrip jatyr. Qylmystyq kodekstiń 339-babymen, ıaǵnı aǵash, butalardy zańsyz kesý, sonyń ishinde Qyzyl kitapqa engen aǵashty kesý boıynsha bes qylmystyq is tergelip jatyr. Sonymen qatar memlekettik organdarǵa qatysty óz ókilettiligin asyra paıdalanǵany úshin jáne qyzmetterindegi áreketsizdigi úshin tergeý bastaldy. Tıisti saraptamalar taǵaıyndaldy. Úsh merdiger men eki memlekettik mekeme jaýap beredi. Olar: Aqtóbe orman sharýashylyǵy mekemesi men Aqtóbe oblystyq orman sharýashylyǵy jáne janýarlar dúnıesi ınspektsııasy. Olar zańsyz ruqsat bergen», - dedi Aqtóbe oblystyq prokýrorynyń aǵa kómekshisi Azamat Qustanov.
Eger kináliler anyqtalsa, aıyppul tólep, 7 jylǵa deıin bas bostandyǵynan aıyrylýy múmkin. Tergeý maýsymda bastalǵan bolatyn.
«Qazirgi kezde 120-dan astam aǵashtyń zańsyz kesilgeni anyqtaldy. Shyǵyn shamamen 5-6 mıllıon teńge», - dedi prokýror.
Eske salsaq, Aqtóbedegi ózender jaıymen Ekologııa jáne tabıǵatty qorǵaý mınıstri Maǵzum Myrzaǵalıev tanysty. Keıin jumystyń jalǵasatyny belgili boldy.