Aqtóbede ózen arnasyn tazartý kezinde zańsyz aǵash kesken merdigerge 3,7 mln teńge aıyppul salyndy
AQTÓBE. QazAqparat – Aqtóbe qalalyq sotynda ózen arnasyn tazartý kezinde aǵashtardy zańsyz kesken merdigerge sot úkimi shyqty, dep habarlaıdy QazAqparat tilshisi.
Aqtóbede 8 ózenniń arnasyn keńeıtý jumystary barysynda aǵashtardyń aıaýsyz kesilgendigi turǵyndardyń narazylyǵyn týǵyzdy. Prezıdent tapsyrmasyna sáıkes Ekologııa mınıstri Maǵzum Myrzaǵalıev jumys saparymen óńirge kelip, jumysty ýaqytsha toqtatty. Kóp uzamaı qorytyndy shyǵarylyp, sý tasqynynyń aldyn alý úshin bul jumystardyń qajet ekeni aıtyldy. Keıin merdigerler jumysy tekserilip, Qyzyl kitapqa engen aǵashtardyń zańsyz kesilgeni anyqtaldy. Іs sotqa joldanyp, búgin úkim shyǵaryldy.
«Qylmystyq kodekstiń «Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý», «Aǵashtar men butalardy zańsyz kesý, joıý nemese zaqymdaý» baptary boıynsha «Berekeldi» JShS-niń jetekshisi N.Ósepov aıypty dep tanylyp, oǵan jalpy kólemi 3 mıllıon 787 myń teńge aıyppul salý jazasy taǵaıyndalsyn», - dedi Aqtóbe qalalyq sotynyń sýdıasy Janas Qýanyshev.
Aıta keteıik, aıyppul bir aı ishinde ótelýi tıis.
