Aqtóbede ózen arnasyn keńeıtý jumystary áli toqtap tur
AQTÓBE. QazAqparat – Aqtóbede ózen arnasyn keńeıtý jumysy toqtap, jobaǵa túzetýler engizilýi tıis bolatyn. Biraq ázirge tıimdi sheshim qabyldanbady, dep habarlaıdy QazAqparat tilshisi.
Aqtóbede 8 ózen arnasyn keńeıtý jumysy 2 jyl buryn bastaldy. Jobalaý jumystarynan soń qurylysqa 6 mıllıard teńgeden astam qarjy bólindi. Keıin jergilikti turǵyndar men tabıǵat janashyrlary narazylyq tanylyp, iske Prezıdent tapsyrmasymen Ekologııa mınıstri aralasty . Jobaǵa qaıta túzetýler men tolyqtyrýlar engizilýi tıis edi. Ázirge naqty jumystar atqarylyp jatqan joq.
«2018 jyly Qarǵaly ózeni arnasyn keńeıtý, tereńdetý jumysy bastalyp, toqtap qaldy. Turǵyndar sý az dep shaǵym aıtqanda jumys keıingi shegerilip, túzetý engizýge qaıta jiberildi. Sodan beri bir toqtamǵa kelmedi. Bir jyldan astam ýaqyt boıy bári bos tur. Únemi ózen jaǵasyna kelemiz. Máselen, Shámshi Qaldaıaqov aýyly mańyn saralasaq. Bul mańda nasos kóp. «QazSýShar» mekemesiniń málimetinde súıensek, Qarǵaly sý qoımasynan sekýndyna 3 tekshe metr sý jiberip otyr. Al bir úlken nasos saǵatyna 2 myń tekshe metr sý aıdaıdy. Osyndaı 6 qurylǵynyń ózi qoımadan jiberilgen sýdy sorýǵa jetkilikti. Biz 23-in anyqtadyq. ıAǵnı, ózen arnasyn keńeıtýden emes, sharýashylyqtardyń kóbeıgeni, nasos qýattylyǵynan qurǵaqshylyqqa tap bolyp otyrmyz», - dedi merdiger mekemeniń ınjeneri Rashıd Slambek.
Ózen mańyndaǵy saıajaı turǵyndary qurylys jumystarynyń jalǵasqanyn surady. Sebebi arna keńeıse, sý tasqyny qaýpi seıiledi.
«Biz ózen mańynda turamyz. Kóktem saıyn «sýǵa ketemiz» dep qorqyp, qujatymyzdy ustap, kóship júretin edik. Tazartý jumystarynan soń bári ózgerdi. Al sýdyń azaıýyna keler bolsaq, sharýa qojalyqtary kóbeıdi, sýarmaly kásippen aınalysatyndar tastardan kedergi jasap, nasos qondyryp alǵan. Saldarynan sý qoımasynan ózenge keletin aǵyn azaıdy», - dedi qala turǵyny Lázzat Qabaqbaeva.
