Aqtóbede ózen arnasy tazartylyp jatyr
AQTÓBE. QazAqparat -Aqtóbe oblysynda sý tasqynynyń aldyn alý jumystary bastaldy. Tótenshe jaǵdaılar qyzmeti ózen arnalaryn tazartyp, sýdy ótkizý joldaryn qarapaıym halyqqa túsindirip jatyr, dep habarlaıdy QazAqparat tilshisi.
Aqtóbe oblysynyń tótenshe jaǵdaılar qyzmeti sý tasqynynyń aldyn alý jumystaryna kiristi. Ótken jyldan sabaq alǵan qutqarýshylar aldymen ózen arnalaryn tazartyp, aryqtardyń jumysyn tekserip jatyr. Sonymen qatar, sý kelgen jaǵdaıda áreket etý joldary aıtyldy.
«Jerdiń betki qabaty qatyp qalǵan. Sondyqtan qar erigen kezde sý eldimekenderge aǵyp kelýi múmkin. Aýyldy sý basý qaýpi basym bolǵan soń ózen arnalaryn tazartyp, aryqtardy qarap shyqtyq. Ótken jyl sýǵa ketken «EKO» baý-baqsha ujymynyń turǵyndaryna túsindirý jumystary júrgizildi. Adamdar habarlama túsken soń qajetti zattaryn shatyrǵa shyǵaryp, ózderi shyǵý kerek. Olar jaryq, gazdy sóndirýge mindetti»,- dedi Aqtóbe oblystyq tótenshe jaǵdaılar departamenti bastyǵynyń orynbasary Qaırat Qasym.
Aqtóbe oblysy boıynsha barlyǵy 43 eldi mekendi sý basý qaýpi bar. Tótenshe jaǵdaılar qyzmeti aýdan, aýylda da sý tasqynynyń aldyn alý jumystaryn júrgizip jatyr.
«Elek ózeniniń arnasy keńeıtiledi. Sonymen qatar, Aqtóbe qalasyna týra jol salyp alǵan jasandy kópir joıylady. Aǵyn sý kelgen kezde osy jerge toqtap, jaıylyp ketken. Ótken jyly úılerdi sý basyp qalǵan edi. Sondyqtan osy qatelik qaıtalanbas úshin birlesken sheshim qabyldandy»,- dedi Qaırat Qasym.
Aıta keteıik, «Kóktem-2018» oqý-jattyǵýy kezinde Sazdy, Aqtóbe, Qarǵaly sý qoımalary tekserildi. Kóktemgi sý tasqynynyń aldyn alý jumystaryna 500-ge jýyq tehnıka daıyndaldy. Onyń ishinde sý arqasyn burý tehnıkalary men qaıyqtar, sý soratyn kólikteri bar. 
