Aqtóbede ózbekstandyqtar mingen avtobýs qar qursaýynan shyǵaryldy
AQTÓBE. QazAqparat - Aqtóbede avtobýs qar qursaýynda qaldy. Ózbekstandyqtar mingen avtobýs ishinde úsh bala bar, dep habarlaıdy QazAqparat tilshisi.
19 qańtar kúni saǵat 11:55-te Mártók aýdandyq qutqarý beketine aýyl turǵyny habarlasty. Mártók aýdany, Baınasaı aýyly mańynda «Neoplan» markaly avtobýs jolda qalǵan. Joldy ashýǵa jaýapty merdiger kompanııa, K-700, ýchaskelik ınspektor baryp, avtobýs ishindegi 57 jolaýshyǵa kómektesti. Onyń úsheýi - bala.
«Bári - Ózbekstan azamaty. Arasynda 7 áıel bar. Eshkim zardap shekken joq. Avtobýs buzylmaǵan. Olar ystyq tamaqtan da bas tartty. Tek qar qursaýynan shyǵýyna kómek kórsetildi», - dedi oblystyq TJD baspasóz qyzmeti.
