Aqtóbede Ózbekstan azamaty 147 ret jol erejesin buzdy
AQTÓBE. QazAqparat - «Mıraj-Ýragan» modernızatsııalanǵan júıesi arqyly Ózbekstan azamatynyń 146 ret jyldamdyqty asyryp, bir ret baǵdarshamǵa baǵynbaǵany anyqtaldy, dep habarlaıdy QazAqparat tilshisi.
Aqtóbe oblystyq polıtsııa departamenti Ákimshilik polıtsııa basqarmasynyń qyzmetkerleri QR jol qozǵalysy erejesin qasaqana buzǵan adamdy anyqtady.
«Mıraj-Ýragan» modernızatsııalanǵan júıesiniń kómegimen Ózbekstan Respýblıkasynyń azamaty ustalǵan. Ol jyl basynan beri 147 ret ereje buzdy.
« VAZ-21099 avtokóliginiń júrgizýshisi 146 ret jyldamdyqty asyryp, bir ret baǵdarshamnyń tyıym salatyn sıgnalynan ótip ketken. Aıyppuldyń jalpy somasy 3 mln 390 myń teńgeni qurady. Polıtsııa materıal jınap, sheshim qabyldaý úshin isti ákimshilik sotqa jiberdi», - dedi oblystyq PD baspasóz qyzmetiniń jetekshisi Erbolat Sarqulov.
Jyl basynan beri «Mıraj-Ýragan» modernızatsııalanǵan júıesiniń kómegimen buryn kólik quralyn basqarý quqyǵynan aıyrylǵan 46 júrgizýshi men 113 memlekettik boryshker anyqtalyp, 21 mln teńgeden astam qarajat óndirildi.
