Aqtóbede Ózbekstan azamattary mingen taǵy bir jolaýshylar kóligi isten shyqty
AQTÓBE. QazAqparat - Aqtóbeniń Yrǵyz aýdanynda Ózbekstan azamattary mingen avtobýs isten shyqty. Olar Reseıdiń Ýfa qalasyna bara jatyr, dep habarlaıdy QazAqparat tilshisi oblystyq TJD baspasóz qyzmetine silteme jasap.
Aqtóbede Ózbekstan azamattary mingen avtobýs taǵy da isten shyqty. Bul joly olardy tótenshe jaǵdaılar qyzmeti qutqaryp qaldy. Barlyǵy 53 jolaýshy din aman, olar jylytý beketterine jetkizildi.
«Keshe keshkilik «Aqtóbe - Yrǵyz» tasjolynyń 306 shaqyrymy, Qalybaı aýylynan 24 shaqyrym jerde «Shymkent-Ýfa» baǵyty boıynsha jolǵa shyqqan «Setra» markili avtobýsy tehnıkalyq aqaýǵa baılanysty jolda turyp qaldy. Avtobýs ishinde Qazaqstannyń úsh júrgizýshisi jáne 53 jolaýshy boldy. Jolaýshylardyń bári Ózbekstan azamaty. Onyń tórteýi bala. Aqtóbe oblysynyń TJD «Apattar medıtsınasy ortalyǵy» kúshimen avtobýstaǵy 53 jolaýshy qutqaryldy. Olardyń ishinde 26 jolaýshy «JPÝ-10» jylytý beketine jáne 27 jolaýshy «Qalybaı» trassalyq medıtsınalyq qutqarý beketine ornalastyryldy»,- dep habarlaıdy oblystyq TJD baspasóz qyzmeti.
«Qazavtojol» qyzmeti tehnıkalyq aqaýy bar avtobýsty Qalybaı aýylyna jetkizdi. Al avtobýs júrgizýshileri jylytý beketine ornalastyryldy. Keıin avtobýstyń barlyq jolaýshysy Qalybaı aýylynyń «Aıat» kafesine jetkizilgen. Negizinen qys maýsymy bastalǵannan beri 6 oqıǵa tirkelip, 147 adam qutqaryldy.
Eske salsaq, 18 qańtar kúni «Ikarýs» markaly avtobýs Shymkentten Reseıdiń Qazan qalasyna bet alyp, túgel órtenip ketken bolatyn. Úkimetaralyq komıssııa órttiń shamnan tutanǵanyn, avtobýs ishinde benzın toly arnaıy quty bolǵanyn anyqtady. Oqıǵa saldarynan 52 jolaýshy kóz jumyp, 5 adam jaralandy. Bul qaıǵyly oqıǵa da Yrǵyz aýdanynyń Qalybaı aýylynan 10 shaqyrym qashyqtyqta tirkeldi.
