Aqtóbede Ózbekstan azamattary mingen kólik aýdarylyp qaldy
AQTÓBE. QazAqparat – Aqtóbede jeńil kólik aýdarylyp, adamdardyń bári aýrýhanaǵa tústi. Júrgizýshiden ózgesi Ózbekstan azamaty, dep habarlaıdy QazAqparat tilshisi.
Aqtóbe oblysy, Áıteke bı aýdany, Qarabutaq aýyly mańynda «Toyota Previa» avtokóligi aýdaryldy. Kólik «Samara-Shymkent» tasjolynyń Yrǵyz aýdanynan Qarabutaq aýyly baǵytynda qozǵalǵan.
Oblystyq polıtsııa departamenti baspasóz qyzmetiniń habarlaýynsha, júrgizýshi rýlge ıe bola almaı, oń joldyń jaǵyna aýdarylǵan.
Jol-kólik oqıǵasy saldarynan avtokólik júrgizýshisi men segiz jolaýshy alǵan dene jaraqatynan Áıteke bı aýdanynyń ortalyq aýrýhanasyna jetkizildi.
«Jaraqat alǵan jolaýshylardyń bári - Ózbekstan Respýblıkasynyń azamaty. Belgili bolǵandaı, olar Qazaqstan Respýblıkasynyń aýmaǵyna Túrkistan oblysy Saryaǵash qalasynyń «Jibek Joly» baqylaý-ótkizý pýnkti arqyly ótip, Atyraý qalasyna jumysqa bara jatqan. Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha sotqa deıingi tergeý bastaldy», - dep habarlady oblystyq PD baspasóz qyzmeti.
Aıtyp óteıik, oblysta shilde aıynda 32 jol-kólik oqıǵasy tirkeldi. Saldarynan 7 adam qaza taýyp, 34 adam túrli dárejedegi jaraqat aldy.
