Aqtóbede óz-ózine qol jumsaǵan ákimniń ornyna jańasy saılandy

AQTÓBE. KAZINFORM — Temir qalasynyń ákimi qyzmetine Muhtar Ákimov saılandy. Ol 662 daýys jınady.

Keshe Aqtóbe oblysynyń Mártók, Oıyl, Temir, Hromtaý aýdandarynda 4 aýyldyq okrýg jáne 1 qala ákiminiń saılaýy ótti. Ekeýiniń ókilettilik merzimi aıaqtalǵan, úsheýiniń ókilettiligi merziminen buryn toqtatyldy. Ol úshin 4 aýmaqtyq jáne 11 ýchaskelik saılaý komıssııasy jumys istedi.

— 5 saılaý okrýgi boıynsha 18 kandıdat usynyldy. Onyń tórteýi «AMANAT» partııasynan, bireýi «Aýyl» partııasynan, bireýi «Respublica» partııasynan, qalǵan 12-i ózin-ózi usynýshy. Kandıdattardyń 13-i memlekettik, 3-i bıýdjettik sala qyzmetshisi, 2-i kommertsııalyq qurylymdardyń qyzmetkeri. Eki kandıdat memlekettik qyzmet zańnamasynyń talaptaryna sáıkes kelmeı, tirkelmedi. Bıýlletender daıyndalǵannan keıin bir kandıdat óz erkimen kandıdatýrasyn alyp tastaý týraly ótinish berdi. Saılaýǵa 15 kandıdat qatysty. Saılanǵan ákimderdiń úsheýi memlekettik qyzmetshi, ekeýi bıýdjettik sala qyzmetkeri. Saılanǵan ákimderdiń eń kishisi 28, eń úlkeni 59 jasta, — dep habarlady Aqtóbe oblystyq aýmaqtyq saılaý komıssııasy.

Temir aýdany boıynsha Temir qalasynda ákim saılandy. Temir aýdandyq aýmaqtyq saılaý komıssııasynyń habarlaýynsha, okrýgte 1465 saılaýshy bar. Onyń 1072-i daýys berdi. Bıýlletenniń beseýi jaramsyz dep tanylyp, ekeýi bárine qarsy bolǵan. Al 662-i Muhtar Ákimovti tańdaǵan.

— Muhtar Ákimov 1967 jyly týǵan. Ol Aqtóbe orman jáne janýarlar dúnıesin qorǵaý mekemesiniń ınjener mehanıgi, Aqtóbe qalasynyń turǵyny. Ony «AMANAT» partııasynan usynǵan, — Temir aýdandyq aýmaqtyq saılaý komıssııasy.

Eske salsaq, 2025 jyldyń jeltoqsan aıynda Temir qalasynyń ákimi Erkin Dalmaǵambetov óz úıinde óz-ózine qol jumsaǵan.