Aqtóbede óz quqyǵyn qorǵaıtyn tutynýshylar sany ósti
AQTÓBE. QazAqparat - 2020 jyly 700-den astam aqtóbelik tutynýshylar quqyǵyn qorǵaý organdaryna júginse, byltyr olardyń sany úsh esege artty, dep habarlaıdy QazAqparat tilshisi.
«Buryn quqyǵy buzylǵan tutynýshalar birden sotqa júginetin edi. Qazir eń aldymen qyzmet kórsetýshige baryp, óz shaǵymyn aıtýy kerek. Oǵan 10 kún ishinde jaýap bermese departamentke shaǵymdana alady. Máselen bizge bir tutynýshy habarlasty. Paltosyn hımııalyq tazalaýǵa bergen. Negizi syrt kıiminiń quny 70 myń teńge. Tazalýdan keıin alǵanda paltoda daq paıda boldy. Aryz satylardan ótip, is sotta qaraldy. Tutynýshy materıaldyq, moraldyq, tipti sot shyǵynyn óndirip aldy»,- dedi Aqtóbe oblystyq tutynýshylardyń quqyqtaryn qorǵaý departamentiniń bas mamany Gúlzada Almatbaeva «Aqtóbe» telearnasynda ótken «Oı túrtki» baǵdarlamasynda. Onyń aıtýynsha, sóredegi men kassadaǵy baǵanyń sáıkes kelmeýi de sońǵy kezde jıi kezdese bastaǵan. Taýar salmaǵy da sáıkes kelmeı jatady.
2020 jyly Aqtóbe oblystyq tutynýshylardyń quqyqtaryn qorǵaý departamentine 700-ge jýyq adam shaǵymdanyp barsa, byltyr úsh esege artyp, 2014-ke jetti. Olar qazir polıtsııa qyzmetkerlerimen de tyǵyz jumys isteıdi. Sebebi óńirde alaıaqtyq deregi kóbeıgen.
«Qazirgi kezde adamdar keıbir taýardy áleýmettik jeli arqyly satyp alady. Saldarynan alaıaqtyq deregi de artty. Dúkenderde, iri saýda oryndarynda aqparattandyrý jumysy júrgizilip jatyr. Biraq nátıje az. Internet dúkender kóp. Alaıaqtar da ákki bola túsken. Taýar satýmen qatar qyzmet kórsetýdi de usynady. Bank qyzmetkeri kod surap, telefon shalmaıdy. Muny adamdar túsinýi kerek»,- dedi oblystyq PD Krımınaldyq polıtsııa basqarmasy bastyǵyń orynbasary Berik Boranbaev.
