Aqtóbede oıynshyq tapanshamen dúken tonamaq bolǵan ury ustaldy
Aqtóbe qalalyq polıtsııa bóliminiń Jedel basqarý ortalyǵynyń «102» nómirine dúkenniń 43 jastaǵy satýshysynan habar túsken. Ol er adam tapanshaǵa uqsas zatpen qorqytyp, kassadaǵy aqshany talap etkenin aıtqan.
«Satýshy oǵan qarsylyq kórsetip, qaraqshyny dúkennen ıterip shyǵaryp, aldyńǵy esikti ishinen jaýyp alǵan. Sodan keıin polıtsııaǵa qońyraý shalǵan. Patrýldik polıtsııa narıady «izin sýytpaı» 37 jastaǵy kúdiktini ustady. Qylmys quraly oıynshyq tapanshasy bolyp shyqty. Atalǵan fakti boıynsha QR QK-niń 192-baby 2-bóligi (Qaraqshylyq) boıynsha sotqa deıingi tergeý amaldary júrgizilýde. Osy baptyń sanktsııasy dúnıe-múlkin tárkileý, bes jyldan on jylǵa deıingi merzimge bas bostandyǵynan aıyrý túrindegi jazany kózdeıdi. Kúdikti Aqtóbe qalalyq ýaqytsha ustaý abaqtysyna qamaldy», - delingen polıtsııa aqparatynda.