Aqtóbede oıynhana ashyp, zańsyz tabys tapqan 3 adamǵa sot úkimi shyqty
AQTÓBE. QazAqparat - Aqtóbede zańsyz oıyn bıznesi uıymdastyrý boıynsha 3 iske sot úkimi shyqty, dep habarlaıdy QazAqparat qarjy monıtorıngi komıtetine silteme jasap.
Aqtóbe oblysy boıynsha ekonomıkalyq tergeý departamenti «Stop ıgra» jedel-profılaktıkalyq sharasy barysynda zańsyz oıyn bıznesin uıymdastyrý faktileriniń aldyn alý jáne joıý maqsatynda jumys júrgizip jatyr.
Bıylǵy qazan jáne qarasha aıynda býkmekerlik keńse túrinde zańsyz oıyn bıznesin júrgizgen 3 oıynhana anyqtalyp, QR QK 307-babyna sáıkes 3 qylmystyq is tirkelgen bolatyn.
Kazirgi ýaqytta atalǵan qylmystyq ister sotta qaralyp, aıyptaý úkimi shyqty.
Atap aıtqanda, Aqtóbe qalasy № 2 sottyń úkimi boıynsha Aqtóbe qalasynyń oıyn-saýyq keshenderiniń birinde jasyryn oıynhana uıymdastyrý faktisi boıynsha qala turǵyny aıypty dep tanylyp, oǵan jaza retinde 200 AEK aıyppul taǵaıyndaldy. Qylmys quraly retinde tanylǵan ( túrli nomınaldy fıshkalar, oıyn kartalary, poker kilemi ) múlikteri tárkilendi.
Sonymen qatar, Aqtóbe qalasy №2 sottyń úkimimen eki azamat kináli dep tanylyp, olarǵa jaza retinde 6 aıdan 1 jylǵa deıingi merzimde bas bostandyǵynan aıyrý jazasy qoldanylyp, qylmys quraly retinde tanylǵan ( sıstemalyq bloktar, monıtorlar, oıyn termınaldary, vıdeoregıstratorlar ) múlikteri tárkilendi.
Atalǵan baǵytta jumys jalǵasýda.
