Aqtóbede oıyn bıznesin zańsyz uıymdastyrǵan aǵaıyndylar sottaldy
AQTÓBE. KAZINFORM — Onlaın kazıno uıymdastyrǵan aǵaıyndylar 8-9 jylǵa bas bostandyǵynan aıyryldy. Al ákimshi men kassır qyzmetin atqarǵan 7 sottalýshy 2-6 jylǵa jaza arqalady.
Aqtóbe qalalyq № 2 sotynda «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý», «Zańsyz oıyn bıznesin uıymdastyrý», «Qylmystyq jolmen alynǵan aqshany jáne (nemese) ózge múlikti zańdastyrý (jylystatý)» baptary boıynsha aǵaıyndylardyń isi qaraldy.
Іs materıalyna súıensek, 2022 jyly aqtóbelik oıyn bıznesin uıymdastyrý, ońaı tabys tabýdy oıǵa alyp, jospar qurady. Keıin inisine bar josparyn aıtyp, ekeýara kelisedi. Sóıtip Aqtóbe oblysynyń terrıtorııasy men Astana qalasynda onlaın bıznesin uıymdastyrady. Onlaın oıyn bıznesine qajetti túrli tehnıka satyp alady, bás tigýge qumar adamdarmen de baılanys ornatady. Keıin eki aǵaıyndynyń biri áıelin ákimshi etip qyzmetke ornalastyrady. Keıin ekinshi qyzmetker jumysqa kirisedi. Sóıtip 2 ákimshi, 5 kassır onlaın qumar oıyn bıznesinde jumys isteıdi.
— 2022-2024 jyldar aralyǵynda qylmystyq top músheleriniń bank kartalaryna únemi aqsha túsip otyrǵan. Bul arnaıy organdardyń nazaryna iligýi múmkin. Sondyqtan uıymdastyrýshylar bank kartasyn qoldanýǵa ruqsat beretin dropperler izdeıdi. Olar týystarynyń bank kartalaryn qoldanady. Oıyn bıznesin uıymdastyrý kezinde páterdi jalǵa aldy. Bonýs, aktsııa týraly habarlamalar jiberip, onlaın kazınoǵa shaqyrdy. Jumys kestesi qurylǵan. Kún saıyn túsken aqshanyń esebi berilgen. Uıymdastyrýshynyń biri túsken aqshanyń bir bóligin Almatydan páter alý úshin burynǵy áıeline berdi. Taǵy bir tanysyna 40 mln teńgeni qaryzǵa berip, ol óteı almaǵan soń Astanadaǵy úıin alady. 2024 jyl Astanadaǵy páterdi 66 mln teńgege satady. Sot otyrysy kezinde sottalýshy kinásin ishinara moıyndady. 2024 jyldyń tamyz aıynda ǵana zańsyz oıyn bıznesimen aınalysqanyn aıtty. 2022-2024 jyldar aralyǵynda adamdardan oıyn bıznesin uıymdastyrýshylarǵa 1,7 mlrd teńge aqsha túsken, — dedi sotta memlekettik aıyptaýshy.
Búgin Aqtóbe qalalyq № 2 sotynda úkim shyqty. K.Salavat Qylmystyq kodekstiń «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý», «Zańsyz oıyn bıznesin uıymdastyrý», «Qylmystyq jolmen alynǵan aqshany jáne (nemese) ózge múlikti zańdastyrý (jylystatý)» baptary boıynsha aıypty dep tanyldy. Túpkilikti 9 jylǵa bas bostandyǵynan aıyrylyp, múlki tárkilendi. Sonymen birge kóligi, tintý kezinde tabylǵan 9 mln teńge aqshasy, uıaly telefondar, noýtbýk, makbýkter memleket paıdasyna tárkilendi.
Al inisi Q.Erkebulan 8 jyl bas bostandyǵynan aıyryldy. Sotta ákimshi qyzmetin atqardy dep aıtylǵan onyń áıeli 6 jylǵa bas bostandyǵynan aıyryldy. Onyń da kóligi, telefony tárkilendi. Ekinshi ákimshi de dál osyndaı jazaǵa tartyldy. Al kassır qyzmetterin atqarǵan 5 sottalýshy 2 jyldan 5 jylǵa deıingi merzimge bas bostandyǵynan aıyryldy. Olar jazasyn qaýipsizdigi tómen túzetý mekemesinde óteıdi. Sottalýshylardyń biri aı-kúni jetip, bosanýǵa daıyndalyp júr. Ol úkim shyqqan kezde sot otyrysyna perzenthanadan kelgen.
Aıta keteıik, Aqtóbe oblysynyń bilim salasynda sapany qamtamasyz etý departamenti bóliminiń basshysy birneshe ret para alǵan. Ol qaıta attestatsııalaý kezinde dırektorlardan 50-70 myń teńge surap, óz qajetine jumsaǵan. Qazir sot otyrysy ótip jatyr.