Aqtóbede ótken halyqaralyq shahmat týrnırinde ırandyq grossmeıster jeńimpaz atandy
AQTÓBE. KAZINFORM – Aqtóbede ótken «Vladımır Dvorkovıchtiń memorıaly – Aktobe Open 2024» halyqaralyq shahmat týrnıri ırandyq Parham Magsýdlýdyń jeńisimen aıaqtaldy, 23 jastaǵy grossmeıster 9 týrda 7,5 upaı jınady.
«Irandyq Kasparov» dep atalyp júrgen P.Magsýdlý 7 jeńiske qol jetkizip, sońǵy týrda Alekseı Saranamen teń oınady. Tek 3-týrda otandasy, Aktobe Open-2023 jeńimpazy Bardııa Daneshvardan jeńilis tapty. Bas júldemen birge ol 9 mln teńge ($20 000) aqshalaı syıaqyǵa ıe boldy.
Ekinshi oryn jáne 7 mln teńge ($15 600) Serbııa atynan shyǵyp júrgen burynǵy reseılik Aleksandr Predkege (2667) buıyrdy – 7 upaı.
Tórt shahmatshy 6½ upaı jınaǵanymen, qosymsha kórsetkishter (Býhgolts koeffıtsıenti) boıynsha Serbııa quramasynyń oıynshysy, taǵy bir eks reseılik Alekseı Sarana (2706) úshinshi orynǵa shyqty. Onyń tabysy – 5 mln teńge ($11 100).
Qytaılyq Bý Sıanchjı (2689), armıan Shant Sargsıan (2637) jáne Belarýs ókili Mıhaıl Nıkıtenko (2525) 6,5 upaımen úzdik úshtikten tys qaldy.
Jarys qorytyndysynda 6 upaı jınaǵan 11 shahmatshynyń arasynda qazaqstandyq Denıs Mahnev (2518) 13-orynǵa jaıǵasty. Tabysty óner kórsetken 24 jastaǵy pavlodarlyq shahmatshy qyrkúıek aıynda ótetin shahmat olımpıadasynda Qazaqstan quramasyn bastap shyǵatyn bolady.
TOP-30-ǵa sondaı-aq 5,5 upaımen Álisher Súleımenov (22-oryn, 2499), Aldııar Ańsat (23, 2421), Ramazan Jalmahanov (25, 2490), Jandos Aǵmanov (26, 2467) jáne 5 upaımen Edgar Mamedov (28, 2410) endi.
Mahnev pen Súleımenov qazaqstandyq qatysýshylar arasynda eki úzdik oıynshy retinde tıisinshe 1 mln ($2200) jáne 700 myń teńge ($1500) aldy.
Aldııar Ańsattyń úshinshi, Edgar Mamedovtiń birinshi grossmeısterlik normany oryndaǵanyn atap ótken jón. Osylaısha, 15 jastaǵy Aldııar Qazaqstan shahmaty tarıhynda eń jas grossmeıster atanady (qazirgi tańda rekord 1998 jyly 19 jasynda 20 jasqa deıingiler arasynda álem chempıony atanǵan Dármen Sádýaqasovqa tıesili). 18 maýsymda 14 jasqa tolatyn Edgar aldaǵy ýaqytta Aldııardyń kórsetkishinen asyp túsýi múmkin.
Áıelder arasynda alǵashqy úsh oryndy reseılikter bólisti. Bas júlde jáne 1,1 mln teńge ($2400) 5,5 upaı jınaǵan (jalpy 21-oryn) halyqaralyq sheber jáne áıelder grossmeısteri Polına Shývalovanyń (2456) qanjyǵasynda ketti. Odan keıin 4 ,5 upaımen Olga Badelko (2385) men Ekaterına Goltseva (2303) ornalasty. Qazaqstandyq qyzdar sátti óner kórsete alǵan joq.
Ashyq birinshilikte (Open A) FIDE sheberi Ilıa Moıseenko (2262) 8 upaımen ozyq shyqty. Qazirgi kezde Aqtaýda turatyn ol óziniń týǵan qalasynda halyqaralyq sheber Kırılla Kýderınovti (2364) jarty upaıǵa artqa qaldyrdy. Munda jeńimpaz 1 mln teńgemen ($2200) marapattaldy.
