Aqtóbede ótken Halyqaralyq ınvestıtsııalyq forým 20 elden qatysýshylardyń basyn qosty
AQTÓBE. KAZINFORM — Aqtóbede shetelden kelgen ınvestorlar, qazaqstandyq iri bıznes ókilderi jáne ortalyq memlekettik organdardyń basyn qosqan «AQTOBE INVESTMENT FORUM — 2025» halyqaralyq ınvestıtsııalyq forýmy ótti, dep habarlaıdy oblys ákimdiginiń baspasóz qyzmeti.
Sharanyń halyqaralyq deńgeıin aıqyndaǵan basty erekshelik — forýmǵa 20 memleketten ókilder jáne 7 elshi qatysty.
Aqtóbe oblysynyń ákimi Ashat Shaharov barlyq qatysýshylardy, qonaqtardy jáne sheteldik delegatsııa ókilderin quttyqtap, forým tájirıbe almasý, syndarly dıalog júrgizý jáne jańa birlesken jobalardy júzege asyrý úshin mańyzdy alańǵa aınalatynyna senim bildirdi.
— Biz árqashan uzaqmerzimdi jáne ózara tıimdi yntymaqtastyqqa ashyqpyz. Bizdiń aımaqqa ınvestıtsııa salýdy oılastyratyn kez kelgen ınvestor óz bastamalarynyń ár kezeńinde qoldaý men jan-jaqty kómek kórsetetinine senimdi bola alady. Aqtóbe oblysy elimizdiń ózge óńirleri arasynda eń úlken aýmaqqa, baı tabıǵı resýrstarǵa, bilikti kadrlarǵa jáne qolaıly geografııalyq ornalasýyna ıe. Oblystaǵy 19 myńnan astam jumys istep turǵan kásiporyn, arnaıy ekonomıkalyq aımaq, agroónerkásiptik keshendegi jobalar óńirdi ınvestıtsııa úshin erekshe tartymdy etedi, — dep atap ótti Ashat Shaharov.
Oblys ákimi jyl basynan beri óńir ekonomıkasyna 892 mıllıard teńge tartylyp, byltyrǵy jylmen salystyrǵanda 129 paıyzǵa artqanyn atap ótti. 2025 jyly jalpy quny 110 mıllıard teńgeden asatyn segiz joba júzege asyryldy, onyń ishinde jańartylatyn energııa kózderiniń iri nysany iske qosyldy.
Oblys ákiminiń quttyqtaý sózinen keıin forýmnyń iskerlik baǵdarlamasy turaqty ósim, ónerkásiptik áriptestik, aýyl sharýashylyǵyn damytý, tsıfrlandyrý máselelerine arnalǵan plenarlyq otyrys pen taqyryptyq sessııalarmen jalǵasty.
Forým 40-tan astam sheteldik kompanııany, sonyń ishinde halyqaralyq uıymdardy, tehnologııalyq habtardy jáne ónerkásiptik korporatsııalardy biriktirdi. 25 kompanııanyń ókilderi bar Qytaıdan kelgen ınvestorlar erekshe qyzyǵýshylyq tanytty.
Olar naqty óndiris salasyndaǵy jobalarǵa, ǵylymdy qajet etetin ázirlemelerge, jańa tehnologııalardy engizý bastamalaryna kóp kóńil bóldi. Qatysýshy kompanııalardy ınnovatsııalyq jáne áleýmettik mańyzdy jobalar, atap aıtsaq, joǵary tehnologııalyq ortalyqtar, ónerkásiptik habtar, qarjy ınstıtýttary, óńdeýshi kásiporyndar men eksporttyq áleýeti bar agroónerkásiptik keshendegi yntymaqtastyq perspektıvalary qyzyqtyrdy jáne halyqaralyq sarapshylardyń pikirinshe, aqtóbelik óndirýshilerdiń ónimderi aıtarlyqtaı sapaly, áleýeti joǵary.
Oblys ákimi Ashat Shaharovtyń aıtýynsha, óńirde máselelerdi tez ári artyq bıýrokratııasyz sheshýge múmkindik beretin qolaıly ınvestıtsııalyq ahýal jasalǵan.
Óndiristik kompanııalar forýmǵa belsendi túrde qatysyp, jańa óndiristik sheshimder men salany jańǵyrtý tásilderin usynyp otyr. Olardyń qatarynda mashına jasaý, metallýrgııa, tsıfrlyq óndiris jáne medıtsınalyq ınfraqurylym salalaryndaǵy jobalar bar.
Forým qorytyndysy boıynsha 448 mlrd teńgeni quraıtyn 17 memorandým men kelisimge qol qoıyldy.
Negizgi jobalarǵa mynalar jatady:
- Hromtaý aýdanynda 100 MVt jel elektr stantsııasynyń qurylysy (SUNGROW, Qytaı);
- STG zaýytynyń jobasy (Condor Energies, Kanada);
- jáne Aqtóbe oblysynda sýsyndar shyǵaratyn zaýyttyń qurylysy (Coca-Cola Almaty Bottlers, Túrkııa), metall buıymdaryn shyǵaratyn metallýrgııalyq zaýyt (Soıýz Metallservıs, Qytaı);
- agroónerkásiptik klasterdi qurý (Harvest Agro Holding, Shveıtsarııa);
- Aqtóbe qalasynda 180 MVt gazben jumys isteıtin elektr stantsııasynyń qurylysy (MUREL, Túrkııa).
«Aqtóbe» AEA basqarýshy kompanııasy «Gantsıýanbao» ekonomıkalyq aımaǵymen (Úrimshi, Qytaı) yntymaqtastyq týraly kelisimge qol qoıdy.
Shara qonaqtaryna óńirdiń ınvestıtsııalyq áleýeti kórsetilip, óńirlik taýar óndirýshilerdiń kórmesi jáne Aqtóbe oblysynyń nysandaryna óndiristik ekskýrsııa uıymdastyryldy.