Aqtóbede ótken ekofestıval 1500 qatysýshynyń basyn qosty
AQTÓBE. KAZINFORM – Shara aıasynda oblys mektepteriniń oqýshylary qorshaǵan ortany qorǵaý boıynsha óz jobalary men ıdeıalaryn usyndy.
Aýqymdy is-shara «Keleshek mektepteri» ulttyq jobasy aıasynda salynǵan №80 orta mektep bazasynda ótip, jas urpaq arasynda ekologııalyq qundylyqtardy nasıhattaýdyń jarqyn alańyna aınaldy.
Ekofestıvalge qatysqan óńir basshysy Ashat Shaharov ekologııalyq mádenıetti erte jastan qalyptastyrý mańyzdy ekenin aıtyp, mundaı bastamalar tabıǵatqa jaýapkershilikpen qaraýdy tárbıeleýge yqpal etetinin jetkizdi.
Ákim sondaı-aq eki jyl buryn Memleket basshysynyń bastamasymen «Taza Qazaqstan» jalpyulttyq jobasy iske qosylǵanyn eske saldy. Búginde bul bastama el aımaqtarynda keń qoldaý taýyp, Aqtóbe oblysynda belsendi júzege asyrylyp keledi.
«Taza Qazaqstan» aktsııasy ózekti ekologııalyq máseleler - aýmaqtardy tazalaý, kógaldandyrý jáne ekologııalyq mádenıetti qalyptastyrýǵa baǵyttalǵan. Tazalyq árqaısymyzdan bastalady jáne kúndelikti ómirdiń ajyramas bóligi bolýy tıis.
Festıvalde usynylǵan jobalar qatysýshylardyń joǵary daıyndyq deńgeıin jáne shynaıy qyzyǵýshylyǵyn kórsetti.
«Jasyl balabaqsha», «Jasyl mektep», «Jasyl kolledj» sııaqty bastamalar ekologııalyq tárbıeniń bilim berý júıesiniń mańyzdy bóligine aınalýda, oǵan sizder - dálelsizder. Ásirese jastardyń belsendiligi qýantady. Sizderdiń bastamalaryńyz ben jobalaryńyz el bolashaǵyn oılaıtyn jaýapty, beıjaı qaramaıtyn urpaqtyń ósip jatqanyn kórsetedi», – dedi ákim.
Ekofestıval baǵdarlamasy aıasynda qonaqtar birqatar mańyzdy jobamen tanysty. Balabaqshalar, mektepter jáne kolledjder usynǵan bastamalar bilim berýdiń barlyq deńgeıinde ekologııalyq tárbıeniń sabaqtastyǵyn tanytty. Ásirese ekojobalar kórmesi men «EKO-ART» jas sýretshiler ekspozıtsııasy úlken qyzyǵýshylyq týdyryp, onda shyǵarmashylyq arqyly ózekti ekologııalyq máseleler kóterildi.
Іs-sharanyń jarqyn sátteriniń biri «Kún nurynan týǵan jasyl álem» taqyrybyndaǵy fleshmob boldy. Ol qatysýshylardy tabıǵatty saqtaý jáne turaqty bolashaq ıdeıasy tóńireginde biriktirdi. Fleshmob barysynda alǵash ret «Taza Qazaqstan» aktsııasyna arnalǵan gımn oryndaldy.
Sondaı-aq, aımaq basshy oqýshy, bilim salasynyń ardagerleri jáne máslıhattardyń depýtattarymen birge №80 mektep aýlasyna kóshetter otyrǵyzdy.
Aıta keteıik, óńirde oblys ákiminiń bastamasymen «Mektep ormanshylyǵy» jobasy belsendi júzege asyrylýda. Onyń aıasynda oqýshylar kóshet otyrǵyzyp, olardy kútip-baptaıdy, osylaısha ekologııalyq tárbıeni tájirıbe júzinde meńgerip, tabıǵatqa degen qamqorlyqty erte jastan qalyptastyrady. Sondaı-aq ekologııalyq tárbıe oblys balabaqshalarynan bastaý alady, onda balalarǵa qorshaǵan ortaǵa jaýapkershilikpen qaraý erte jastan úıretiledi.
