Aqtóbede ótken aıtysta eldi birlikke shaqyrǵan aqyn jeńiske jetti
AQTÓBE. QazAqparat Aqtóbede «Aqtóbem meniń, eńseli, jyryma qosam men seni» atty respýblıkalyq aıtys ótti, dep habarlaıdy QazAqparat tilshisi.
Sońǵy jyldary Aqtóbede respýblıkalyq aqyndar aıtysyn ótkizý dástúrge aınaldy. Ótken jyly Qazaq handyǵynyń 550 jyldyǵyna arnalsa, bıyl Aqtóbe oblysynyń 85 jyldyǵyna oraı ótkizildi. «Nur Otan» partııasynyń qoldaýymen Aqtóbe oblysynyń ákimdigi, tilderdi damytý basqarmasy elimizge tanymal sóz sheberlerin shaqyryp, aqtóbelikter eki kún boıy el men jerdi, ulttyq qundylyqtarymyz ben ishki, syrtqy saıasatty jyrlaǵan aıtysty tamashalady.
Al búgin bas júlde aqyn Tólegen Jamanovqa buıyrdy. Júldege 2 mıllııon teńge berildi. Al birinshi oryndy Rınat Zaıytov ıelendi. Jansaıa Mýsına ekinshi oryn aldy. Úshinshi oryn úsh aqynǵa berildi. Olar: Maqsat Aqanov, Meıram Sultanhan, Dıdar Qalıev.
Aıtysty júrgizgen Júrsin Erman óz sózinde, «kezinde metsınattardyń demeýimen jolǵa túsken aqyndar aıtysy qazir bılikte júrgen, ultqa jany ashıtyn 4-5 ákim arqasynda kún kórip jatyr» dedi.
Aıtys júldegerlerin oblys ákimi Berdibek Saparbaev quttyqtap, aıtyskerlerge aqtóbelikter atynan alǵys aıtty.
«El bolashaǵy rýhymyzdyń myqtylyǵyna baılanysty. Al rýhanı baılyǵymyzdyń biri, baıaǵydan kele jatqan, babalarymyzdan taraǵan aıtys. Aıtys naǵyz sózdiń shesheninen týǵan. Biz Jansaıa men Tólegenniń aıtysyn kórdik. Tólegen taýyp aıtty. Ol: «Birlik bolsyn, birlik bolmasa jońǵarlar sııaqty joıylamyz» dedi. Qandaı keremet sóz. Osy sózdi umytpaý kerek», - dedi Berdibek Saparbaev.
Eki kúnge sozylǵan aıtys kezinde Rınat Zaıytovtyń sózi el aýzynda qaldy. Ol aqtóbelik aqynǵa «atyń da, shapanyń da kerek emes, shyǵysqa Berdibek Saparbaevty qaıtarsańdar eken» dedi.
«Aı dıdarly Aqtóbedeı qalań bar,
Týylmaıdy munda tegin adamdar.
Tabanymen tirep jaqan irgeńdi,
Taý tulǵaly tama Esetteı babań bar»,- degen Rınat Zaıytov aqtóbelikterge rızashylyǵyn bildirdi.
