Aqtóbede ótken aýqymdy ekoaktsııada jastar qoqys jınap jarysty
AQTÓBE. KAZINFORM — Aqtóbede «Taza Qazaqstan» jalpyulttyq baǵdarlamasy aıasynda uıymdastyrylǵan «JasylCross — 2026» ekologııalyq ploggıngine 500-ge jýyq jas qatysyp, bir kúnniń ishinde 1317 qap qoqys jınady, dep habarlaıdy oblys ákimdiginiń baspasóz qyzmeti.
Bogoslov tasjoly boıynda ótken aýqymdy ekologııalyq aktsııa óńirdegi eń iri bastamalardyń birine aınaldy. Sharaǵa jas ekobelsendiler, volonterler, jastar uıymdarynyń músheleri, «Jasyl el» eńbek jasaqtarynyń sarbazdary jáne qoǵam belsendileri qatysyp, tabıǵatty tazartý isine óz úlesterin qosty.
Ploggıng formatyndaǵy jarys barysynda qatysýshylar belgilengen aýmaqta júgirý jáne jaıaý qozǵalý arqyly turmystyq qaldyqtardy jınady. Nátıjesinde birneshe saǵattyń ishinde aýmaqtan 1317 qap qoqys shyǵarylyp, tabıǵı orta tazartyldy.
Qazylar alqasy komandalardyń belsendiligi men jınalǵan qaldyqtardyń kólemin baǵalap, úzdikterdi anyqtady. Qorytyndysynda úzdik nátıje kórsetken eki komanda kýbok jáne medaldarmen marapattaldy. Al jarysqa qatysqan ózge komandalarǵa alǵys hattar tabystaldy.
Aktsııanyń basty maqsaty — jastardyń ekologııalyq mádenıetin arttyrý, qoǵamda tazalyq pen jaýapkershilik qaǵıdattaryn nyǵaıtý jáne qoǵamda tazalyq qundylyqtaryn dáripteý.
«Atameken» stýdentter otrıady jastar qoǵamdyq birlestiginiń basshysy Nurjan Shańǵytbaevtyń sózinshe, mundaı jobalardyń qoǵam úshin mańyzy zor.
— «JasylCross — 2026» ekologııalyq ploggıngi — jastardyń tabıǵatqa degen janashyrlyǵy men azamattyq jaýapkershiligin aıqyn kórsetetin mańyzdy bastama. Biz árbir jasty qorshaǵan ortany qorǵaýǵa jáne týǵan ólkemizdiń tazalyǵyn saqtaýǵa óz úlesin qosýǵa shaqyramyz. «Taza Qazaqstan» baǵdarlamasy aıasyndaǵy mundaı is-sharalar ekologııalyq mádenıetti qalyptastyryp qana qoımaı, qoǵamdaǵy birlik pen ortaq jaýapkershilik qundylyqtaryn nyǵaıtady. Taza tabıǵat — jarqyn bolashaqtyń kepili, sondyqtan bul ıgi iske belsendi qatysý — árqaısymyzdyń ortaq mindetimiz, — dedi ol.
Uıymdastyrýshylardyń aıtýynsha, «JasylCross — 2026» ekologııalyq ploggıngi dástúrli sharaǵa aınalyp keledi jáne aldaǵy ýaqytta da óz jalǵasyn tabady. Óıtkeni bastama jastardyń qorshaǵan ortany qorǵaý mádenıetin qalyptastyryp qana qoımaı, tabıǵatqa janashyrlyqtyń sózben emes, naqty ispen dáleldenetinin taǵy bir márte kórsetipti.
