Aqtóbede ótetin ınvestıtsııalyq forým kezinde 300 mlrd teńgeniń memorandýmyna qol qoıylady
AQTÓBE. QazAqparat - Aqtóbede «Aktobe Invest-2017» halyqaralyq ınvestıtsııalyq forýmy ótedi. Forým kezinde qonaq úı, gaz óńdeý keshenin, logıstıkalyq ortalyq salý sekildi birneshe jobalardy iske asyrý kelisimi jasalady, dep habarlaıdy QazAqparat tilshisi.
Bir aptadan soń AQSh, Polsha, Italııa, Armenııa, Reseı men Qytaı, Birikken Arab Ámirligi, Aýǵanstan jáne Slovakııadan ınvestorlar keledi. 15 elden 300-den astam adam eki kún boıy Aqtóbeniń ınvestıtsııalyq jobalarymen tanysady. Jospar boıynsha forýmnyń alǵashqy kúni Aqtóbe ferroqorytpa zaýyty, Aqtóbe rels-arqalyq zaýyty et óńdeý kombınattary men jylyjaı keshenderi tanystyrylady. Sonymen qatar, óńirde memlekettik-jekeshelik áriptestik aıasynda salynyp jatqan jedel járdem beketi, qalalyq stomatologııalyq emhana, oftalmologııa ortalyǵy kórsetiledi. Investorlar «Aqtóbe» ındýstrıaldy aımaǵyna baryp, gaz, sý, jaryǵy men temir joly jetkizilgen óndiris ornynyń jańa múmkindikterin kóredi.
«Forýmdy uıymdastyrý kezinde shetelde oqyp júrgen aqtóbelik jastar kómek berdi. Olar shetelde oqyp, keıbiri jumys isteıdi.Sondyqtan biz Aqtóbe oblysynyń ınvestıtsııalyq múmkindigin jetkizetin aqparattyq habarlamalardy taratyp, óńirge ınvestor shaqyrý týraly usynys berdik. Aqtóbe oblysynyń ákimdigi men «SNPS-Aqtóbemunaıgaz» AQ arasyndaǵy kelisim aıasynda Beıjińnen ákimdiktiń ókildigi ashyldy. Aqtóbe oblysy ákimdiginiń Qytaıdaǵy ókildigi arqyly biz óńirde shyǵarylatyn ónimdi jarnamalaı alamyz. Eriktiler, stýdentter jumyldyrylady»,- dedi Aqtóbe oblysy ákiminiń orynbasary Qaırat Bekenov.
Aıta keter jaıt, osy ınvestıtsııalyq forým kezinde quny 300 mıllıard teńge bolatyn 15 memorandýmǵa qol qoıý josparlanyp otyr.
«Eýropalyq qarjy ınstıtýtynyń qoldaýymen «A» klasty jylyjaı kesheni salynady. Jańa jylyjaı zamanaýı tehnologııamen jabdyqtalady. Sonymen qatar, mal sharýashylyǵy salasynda birqatar kelisimge qol qoıylady. Aqtóbede óndirilgen et qazir Iran, Birikke Arab Ámirligine tasymaldanyp jatyr. Іri sheteldik kompanııalar óńirdegi et óńdeý kombınattarymen kelisim shartqa qol qoıýǵa ázir. Biz etti eksporttardy birizge salyp, josparly jumys isteýdi kózdep otyrmyz. Forým kezinde ken oryndarymen de memorandýmǵa qol qoıylady. Aldaǵy ýaqytta ishi munaı kompanııalarynyń janynan shaǵyn jáne orta kásip ashylady. Munda munaı óndirý, óńdeýge qajetti qosalqy bóshekter shyǵarylady. Aqtóbedegi transulttyq kompanııalardyń múmkindigin de keń paıdalaný kózdelýde»,- dedi Qaırat Bekenov.
Eske salsaq, bıyl ınvestıtsııalyq forým «EKSPO-2017: Óńirlerdiń damý serpini» ataýymen ótedi. Aqtóbe qazirge kezde ınvestorlardy tartý boıynsha elimiz boıynsha kóshbasshylar qatarynda tur. Al 2015 jylǵy forým kezinde quny 300 mıllıard teńge bolatyn 12 memorandýmǵa, ótken jyly 14 memorandýmǵa qol qoıyldy.
