Aqtóbede ótetin gir kóterýden álem chempıonatyna 700-deı sportshy keledi
ASTANA. QazAqparat - Qazan aıynda Aqtóbede gir kóterý sportynan álem chempıonaty ótedi. Bul týraly oblys ákimi Berdibek Saparbaevtyń tóraǵalyǵymen chempıonatty uıymdastyrý komıtetiniń otyrysynda jarııa etildi, dep jazady «Aqtóbe» gazeti.
Oblys ákiminiń baspasóz qyzmetiniń habarlaýynsha, gir kóterý sportynan álem chempıonaty qazan aıynyń 26-30 kúnderi «Qonys» sport saraıynda ótedi. Daıyndyq jumystary tamyzdyń jıyrmasynan bastalady. Uıymdastyrý komıtetiniń quramyna oblystyq federatsııa ókilderi men dene shynyqtyrý jáne sport basqarmasynyń qyzmetkerleri kiredi. Chempıonatqa 35 elden 700-ge tarta sportshy qatysady. Qatysýǵa ótinish berý qyrkúıektiń ekinshi jartysynda aıaqtalady.
Jıynda Berdibek Saparbaev sharany joǵary deńgeıde ótkizýdi tapsyrdy.
- Bul - óńirdegi sportty damytýǵa jáne ilgeriletýge yqpal etetin mańyzdy shara. Biz chempıonattyń joǵary deńgeıde ótýi úshin bar kúshimizdi salýymyz kerek, - dedi óńir basshysy.
Oblys ákimi álemdik deńgeıdegi sporttyq báskelestikke daıyndyq kezinde elimizdiń ulttyq ereksheligin kórsetý kerektigin atap ótti.
