Aqtóbede ótemaqy alý úshin shartty nekege turǵan áskerı qyzmetshi sottaldy

AQTÓBE. KAZINFORM – QR Ulttyq ulany «Batys» óńirlik qolbasshylyǵy tyl basqarmasynyń bastyǵy 6 balaly otbasymen kelisip, 60 mln teńgeden astam paıda tappaq boldy. Shartty nekege kelisken otbasyna 4,5 mln teńge bergen.

Aqtóbede ótemaqy alý úshin shartty nekege turǵan áskerı qyzmetshi sottaldy
Foto: Ulttyq statıstıka bıýrosy

Aqtóbe garnızonyń áskerı sotynda QR Ulttyq ulany «Batys» óńirlik qolbasshylyǵy tyl basqarmasynyń bastyǵyna Qylmystyq kodekstiń «Alaıaqtyq» baby boıynsha aıyp taǵyldy. E.Roman bul qyzmetke 2024 jyldyń maýsym aıynda taǵaıyndalady. Ol senimge kirip, asa iri kólemde paıda tappaq bolady. Sóıtip Soltústik Qazaqstan oblysyndaǵy aýyldardyń birinde turatyn alty balaly otbasyny tabady. Shartty nekege turyp, ol qyzmeti úshin 4 500 000 teńge berýge kelisedi. 2024 jyly shilde aıynda eki jaqtyń kelisiminen soń neke qıylyp, áskerı qyzmetshi kýálikti, qujattardy jınap, jumys ornyna tapsyrady. QR Ulttyq ulanynyń «Batys» óńirlik qolbasshylyǵynyń turǵyn úı komıssııasy shartty nekedegi kámeletke tolmaǵan 6 balany tirkeıdi. Komıssııa 66 598 024 teńge aqshalaı ótemaqy berýge sheshim qabyldaıdy. Qarjy Otbasy banktegi arnaıy esepshotyna aýdarylady.

Sot kabınetindegi aqparatqa súıensek, sottalýshy bank esepshotyndaǵy aqshany sheship alý úshin áskerı ýchılışede birge oqyǵan dostaryna ótinish jasaıdy. Kóp uzamaı páterdi shartty túrde satyp alady jáne baspana quny kelisimshartta 67 371 280 teńge dep kórsetildi. Keıin kelisim boıynsha Petropavl joǵary áskerı ýchılışesinde birge oqyǵan dosy qarjyny sottalýshynyń ekinshi deńgeıli banktegi esepshotyna aýdarady. Sottalýshy anasy arqyly shartty nekege kelisken otbasyna 4 500 000 teńge beredi, qalǵanyn óz qajetine jumsaıdy. Sotta memleketke keltirgen shyǵyn 62 997 858 teńge dep kórsetildi.

Sottalýshy E.Roman ózine taǵylǵan aıypty tolyq moıyndady. Jábirlenýshi tarap, ıaǵnı áskerı bólim ókili shyǵynnyń tolyq ótelgenin aıtyp, azamattyq talap aryz bermeıtinin jetkizdi.

Sottalýshy E.Roman Qylmystyq kodekstiń 190-baby 2-bóligi 4-tarmaǵymen aıypty dep tanylyp, 5 jyl 6 aıǵa bas bostandyǵynan aıyryldy. «Raqymshylyq týraly» Zańǵa sáıkes túpkilikti 4 jyl 4 aı 24 kúnge jaza kesildi. Qylmystyq kodekstiń 63-babyna sáıkes shartty jazaǵa aýystyryldy. Ol probatsııalyq baqylaýda bolady. Polkovnık sheninen aıyryldy.

Eske salaıyq, Mańǵystaýda áskerı qyzmetshi shartty neke quryp, memleketke 43 mln teńge shyǵyn keltirdi. Ol turǵyn úı ótemaqysyn alý úshin tanysynyń áıeline úılendi.