Aqtóbede otbasyn saqtaý ortalyǵy ashyldy
AQTÓBE. QazAqparat - Aqtóbedegi «Anaǵa taǵzym» ortalyǵynda Otbasyn saqtaý ortalyǵy ashyldy. Munda uzaq jyldar boıy tatý-tátti turyp jatqan otbasydan úlgi-ónege alyp, qoǵam qaıratkerleriniń taǵylymdy áńgimesin tyńdaýǵa bolady. Sonymen qatar psıhologtar keńes beredi, dep habarlaıdy QazAqparat tilshisi.
«Qoǵam qaıratkerleri, kópbalaly analar men muǵalimder, dárigerler ortalyqtyń jumysyna kómek kórsetedi. Ótken jyly Joǵarǵy sottyń bastamasymen Otbasylyq sot jobasy qolǵa alynǵan bolatyn. Al búgin Otbasyn saqtaý ortalyǵy ashyldy. Endi sot arqyly nekeni buzýdy qalaıtyndardyń bári osy ortalyqqa jiberiledi. Sebebi elimizde ǵana emes, Aqtóbede de ajyrasyp jatqan jas otbasylar kóp», - deıdi Aqtóbe oblysy ákimi janyndaǵy áıelder isteri jónindegi komıssııasynyń hatshysy Aqmaral Hon.
Ótken jyldyń 4 aıynda Aqtóbede 1 myńnan astam otbasy ajyrasýǵa aryz túsirdi. Al bıyl dál sol ýaqyt aralyǵynda 1200-den astam shaǵym túsken. Olardyń 500-den astamy tatýlassa, 400-i nekeni buzdy.
«Sotta da tatýlasýǵa múmkindik beriledi. Erli-zaıyptylardyń arasyndaǵy jylylyqty saqtap qalý úshin psıhologtyń kómegine júginemiz. Turmystyń tómen bolýy, zorlyq-zombylyq, taraptardyń biriniń ishimdikke, esirtkige áýestigi, qumar oıynǵa salynýy da keri áserin tıgizedi. Oıynqumarlar bankten nesıe alyp, qaryzǵa batady. Eńbekaqy ala almaı júrgender men balaly bola almaǵandar da nekeni buzýǵa aryz túsiredi. Sot otyrysyna kelgen ár otbasyǵa psıhologııalyq kómek kórsetilip jatyr. Keıde erli-zaıyptylar bir-birin syılamaı, aýyr sózder aıtady», - dedi Aqtóbe qalalyq sotynyń sýdıasy Aıgúl Abdýllına. Sýdıanyń aıtýynsha, qartaıǵan shaqta ajyrasatyndar da kezdesedi.
«Erli-zaıyptylardyń ortaq áńgimesi bolmaǵan kezde ajyrasady. Máselen, 30 jyl boıy birge turǵan erli-zaıypty nekelerin buzdy. Keıde biri qyzynyń, ekinshisi ulynyń aıtqanyn qoldap, eki jaqqa ketedi. Olarǵa psıhologııalyq kómek kórsetiledi. Kóbine balalary kómekke keledi», - dedi sýdıa Aıgúl Abdýllına.
