Aqtóbede otandyq jáne sheteldik hırýrgter zamanaýı emdeý tásilderin talqylady
AQTÓBE. KAZINFORM — Aqtóbede «Zamanaýı hırýrgııanyń ózekti máseleleri» atty respýblıkalyq ǵylymı-praktıkalyq konferentsııa ótti. Konferentsııa jumysyna Qazaqstannyń jetekshi hırýrgteri, ǵalymdary men medıtsına qaýymdastyǵynyń ókilderi, sondaı-aq Belarýs, Túrkııa, Ońtústik Koreıa, Ózbekstan jáne Qyrǵyzstannan kelgen mamandar qatysty.
Konferentsııanyń ashylý rásiminde alǵy sóz alǵan Aqtóbe oblysynyń ákimi Ashat Shaharov hırýrgııany damytý zamanaýı tehnologııalar men medıtsınalyq qural-jabdyqtarmen qatar, bilikti mamandar daıarlaýdy da talap etetinin alǵa tartty.
— Búgingi basqosý — tájirıbe almasatyn kezekti jıyn ǵana emes, hırýrgııa salasynyń búgingi ahýalyn saralap, onyń bolashaǵyna qatysty naqty baǵyttardy aıqyndaıtyn mańyzdy kásibı alań dep bilemin.
Memleket basshysy Qasym-Jomart Kemeluly Toqaevtyń tapsyrmasyna sáıkes densaýlyq saqtaý júıesin damytýǵa asa kóńil bólinýde. Sońǵy úsh jylda Aqtóbe oblysynda osy salaǵa 20,3 mlrd teńge baǵyttalyp, 40 medıtsınalyq nysan salyndy, taǵy 40 ǵımaratqa kúrdeli jóndeý júrgizildi.
Óńir úshin hırýrgııalyq qyzmetti damytý, zamanaýı tehnologııalardy engizý, mamandardyń biliktiligin arttyrý jáne medıtsınalyq kómektiń sapasyn qamtamasyz etý erekshe mańyzǵa ıe. Oblys statsıonarlarynda jyl saıyn shamamen 50 myń patsıentke hırýrgııalyq kómek kórsetilip, 12 myńnan astam operatsııa jasalady.
Medıtsınalyq kadrlardy daıarlaý men ǵylymdy damytýda Marat Ospanov atyndaǵy Batys Qazaqstan medıtsına ýnıversıtetiniń mańyzy zor. Al halyqaralyq yntymaqtastyq dárigerlerimizge sheteldik ozyq tájirıbeni meńgerýge múmkindik beredi. Búgin Aqtóbege jınalǵan Qazaqstannyń jetekshi hırýrgteri men sheteldik mamandardyń kásibı tájirıbesi óńirdegi hırýrgııalyq qyzmetti odan ári damytýǵa jańa serpin beretinine senimdimin, — dedi Ashat Shaharov.
Konferentsııa aıasynda medıtsına men hırýrgııa salasynyń damýyna eleýli úles qosqan mamandardy marapattaý rásimi ótti. «Aqtóbe oblysynyń damýyna qosqan úlesi úshin» tósbelgisimen «Bashkent» ýnıversıtetiniń professory Mehmet Haberal (Túrkııa), akademıkter men professorlar Jaqsylyq Dosqalıev pen Bolatbek Baımahanov, professor Sálim Berkimbaev, sondaı-aq medıtsına ǵylymdarynyń doktory, professor Qaırat Sabyr marapattaldy.
Aqtóbe oblysy ákiminiń Qurmet gramotasymen Qazaqstan men shetelden kelgen taǵy on maman marapattaldy. Olardyń qatarynda Ózbekstan, Qyrǵyzstan, Belarýs elderinen, sondaı-aq Astana, Almaty, Semeı, Qyzylorda jáne Taraz qalalarynan kelgen belgili hırýrgter men ǵalymdar bar. Marapattar hırýrgııalyq qyzmetti, medıtsınalyq ǵylymdy, halyqaralyq yntymaqtastyqty jáne ǵylymı-praktıkalyq baılanysty damytýǵa qosqan úlesi úshin tabystaldy.
Konferentsııanyń negizgi baǵdarlamasy plenarlyq otyrystarmen jalǵasty. Bir alańda hırýrgııa, transplantologııa, onkologııa, qan tamyrlary jáne kardıohırýrgııa salalarynyń mamandary bas qosty. Olar kásibı tájirıbelerimen bólisip, zamanaýı jetistikter men ǵylymı ázirlemelerdi tanystyrdy. Sondaı-aq hırýrgııalyq qyzmetti odan ári damytý jáne medıtsınalyq tájirıbege jańa tásilderdi engizý máselelerin talqylady.
Іs-sharaǵa Seýl ulttyq ýnıversıtetiniń professory Kvang Výng Lı de onlaın formatta qatysty. Ol buǵan deıin qazaqstandyq mamandarmen transplantologııa salasynda birlesip jumys istegen. Óz sózinde professor dárigerler arasyndaǵy halyqaralyq yntymaqtastyq pen tájirıbe almasýdyń mańyzdylyǵyn atap ótti.
Konferentsııa qorytyndysy boıynsha qatysýshylar hırýrgııalyq kómekti jetildirý, mamandardyń kásibı quzyretterin damytý jáne zamanaýı medıtsınalyq tehnologııalardy engizýge qatysty aldaǵy jumystyń negizgi baǵyttaryn aıqyndady. Mundaı kezdesýler kásibı baılanystardy nyǵaıtyp, óńirdegi hırýrgııalyq qyzmetti odan ári damytýǵa múmkindik beredi.
