Aqtóbede osymen besinshi márte Baqytty Bala halyqaralyq baıqaýy ótedi
Baqytty Bala – Aqtóbe oblysynyń brendine aınalǵan erekshe joba.
Baıqaý 2018 jyly oblysta «Balalar jyly» dep jarııalaýyna oraı tuńǵysh ret ótkizildi jáne jalǵasyn taýyp uıymdastyrylyp keledi.
Baıqaýǵa qatysýǵa 2018 jyly - 420, 2019 jyly - 500-den asa, 2021 jyly - 180 ónerli óren nıet bildirdi.
Onyń ishinde Qazaqstan qalalarymen qatar, Ózbekstan, Qyrǵyzstan, Reseı, Ýkraına, Belorýs, Moldava, Túrkııa, Gretsııa, Ispanııa, Rýmynııa, Polsha, Kanada memleketteri bar.
«Baqytty Bala -2018» ashyq balalar vokaldyq festıval-baıqaýynyń bas júldesin Narǵyz Januzaqova (Aqtóbe qalasy) men Erjan Maksım (Nur-Sultan qalasy), «Baqytty Bala -2019» ashyq balalar vokaldyq festıval-baıqaýynyń bas júldesin Islam Balkoev (Reseı qalasy) jáne Aıkerim Tileýbek (Nur-Sultan qalasy) ıelendi.
2021 jyly bas júldeni Taraz qalasynan kelgen 13 jasar Aılýn Zaýsheva qanjyǵasyna baılady.
«Baqytty Bala-2021» baıqaýyndaǵy eń qalaýly marapat - Dımash Qudaıbergenniń syılyǵy.
Jas ónerpaz Dımash Qudaıbergenniń shetelde ótetin jeke kontsertine arnaıy shaqyrtýdy Nur-Sultan qalasynyń turǵyny Adel Qunádilova aldy.
Shaqyrtý ǵana emes, álem moıyndaǵan Dımash Qudaıbergenmen bir sahnada turyp án salý múmkindigine ıe boldy. Dımashtyń jeke kontsertine qatysyp, onymen birge án salý múmkindigi Baqytty Bala baıqaýynyń buǵan deıingi qatysýshylaryna da berilgen bolatyn.
Baqytty Bala-2018 baıqaýyndaǵy bul nomınatsııa ıegeri aqtóbelik Narǵyz Januzaqova ánshiniń Londondaǵy kontsertine bardy, al, 2019 jylǵy Gran-prı ıegeri Áıkerim Tileýbek Nıý-Iork tórinde mıllıondaǵan kórermen aldynda Dımashpen birge án shyrqady.
Bıyl atalmysh baıqaý «Dımash-Álı» shyǵarmashylyq ortalyǵy jáne Aqtóbe oblysy ákimdiginiń qoldaýymen, Aqtóbe oblysynyń mádenıet, arhıvter jáne qujattama basqarmasy, Ǵ.Jubanova atyndaǵy oblystyq fılarmonııasynyń uıymdastyrýymen 9-14 tamyz aralyǵynda «Óner ortalyǵy» kontsert zalynda ótedi.
Іrikteý kezeńine 200-ge jýyq ótinish qabyldandy.
Reseı, Ózbekstan, Túrkııa, Ýkraına, Polsha, Ispanııa, Rýmynııa, Ázirbaıjan, Armenııa, Bolgarııa, Afrıka memleketterinen jáne elimizdiń barlyq qalalarynan saıysqa qatysýshy úmitkerlerdiń ótinishteri qabyldandy. Qashyqtyqtan tyńdaý nátıjesi boıynsha 20 jetkinshek aqtyq márege joldama aldy.
Jas ónerpazdardyń ónerin mádenıet salasynyń belgili ókilderi baǵalaıtyn bolady.
Ashat Maemırov – QR eńbek sińirgen qaıratkeri, PhD doktory, professor, Nur-Sultan qalasyndaǵy mýzykalyq jas kórermen teatrynyń dırektory jáne kórkemdik jetekshisi;
Marat Áıtimov – QR Eńbek sińirgen qaıratkeri, Aqtóbe oblysynyń «Qurmetti azamaty», ustaz, Ǵ.Jubanova atyndaǵy Aqtóbe oblystyq fılarmonııasynyń ánshisi;
Qanat Aıtbaev – QR eńbek sińirgen qaıratkeri, «DimashAli» shyǵarmashylyq ortalyǵynyń jetekshisi;
Rýhııa Baıdúkenova – «Shapaǵat» medaliniń ıegeri, «Daryn» memlekettik jastar syılyǵynyń laýreaty, «Slavıan bazary-2021» halyqaralyq óner festıvaliniń gran-prı ıegeri, R.Baǵlanova atyndaǵy memlekettik «Qazaqkontsert» kontserttik uıymynyń ánshisi
Ernar Nurtazın – Halyqaralyq baıqaýlardyń laýreaty, Nur-Sultan qalasy ákimdiginiń memlekettik akademııalyq fılarmonııasynyń sımfonııalyq orkestriniń Bas dırıjery.
Baıqaý erejesine sáıkes, saıys 2 kezeńnen turady. Alǵashqy kezeńde uıymdastyrý komıteti aýdıo, vıdeo materıaldar arqyly qashyqtyqtan tyńdaý arqyly úzdik oryndaýshylardy iriktedi. Fınalǵa ótken qatysýshylar eki shyǵarma-óz ana tilinde (nemese avtorlyq án) jáne álemdik hıt oryndaıdy. Qazylar alqasynyń sheshimi gala kontsertte jarııalanady.
Baıqaýdyń júlde qory - 3 mln 450 myń teńge.
Gala-kontsert 13 tamyz saǵat 19:30-da Óner ortalyǵynda ótedi. Bıletterdi Tıketon saıtynan nemese kontsert zalynyń kassasynan satyp alýǵa bolady.
