Aqtóbede ósimdik maıyn shyǵaratyn zaýyt iske qosylady
Aqtóbede biregeı zaýyt qurylysy júrip, kásiporyndy iske qosý jumysy bastaldy. Buǵan deıin habarlaǵanymyzdaı, Aqtóbe oblysynyń sharýalary maıly daqyldardy ótkizý máselesin sheshti. Hromtaý aýdanynyń Jazyq aýylynda Aqtóbe maıdy ekstraktsııalaý zaýyty paıdalanýǵa beriledi. Munda kúnbaǵys, maqsary, zyǵyr qabyldanady.
«Maıly daqyldardy óńdep, ósimdik maıyn shyǵaratyn zaýyt qazaqstandyq úlesti arttyrýǵa múmkindik beredi. Sonymen qatar, jańa jumys oryndary ashylyp, salyq túsimi de artady. Zaýytty iske qosýǵa 1,5 mıllıard teńge jumsaldy. 704 mıllıon teńge kásipkerdiń óz qarjysy bolsa, qalǵan 796 mıllıon teńge «AgroNesıeKorporatsııa» AQ arqyly berildi. Barlyǵy 80 adam jumys isteıdi. Munda tazartylǵan jáne tazartylmaǵan ósimdik maıy, kúnjara shyǵarylady. Jylyna 36 myń tonna ónim alý josparda bar», - dep habarlady oblystyq aýyl sharýashylyǵy basqarmasynyń baspasóz qyzmeti.
Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýy aıasynda iske qosylatyn zaýyt ónimi eksporttalady. Daıyn ónim aldaǵy ýaqytta Qytaı, Reseı, Ózbekstan, Tájikstan elderine jiberilse, ósimdik maıynyń 15 paıyzy ishki naryqqa, elimizdiń batys óńirine tasymaldanatyn boldy.
Aıta keteıik, zaýytty iske qosý jumystary kezinde «Bıznestiń jol kartasy - 2020» memlekettik baǵdarlamasy aıasynda qajetti ınfraqurylym jelisi jetkizildi. Sonymen qatar, qajetti qural-jabdyqtar satyp alý kezinde kómek berildi.
