Aqtóbede osy aıda kún jaýyn-shashyndy bolady

AQTÓBE. KAZINFORM — Aqtóbe oblysynda sáýir aıynyń ekinshi onkúndigi ádettegiden salqyn bolady. Sonymen birge oblystyń soltústiginde jaýyn-shashyn normadan joǵary bolýy yqtımal.

Aqtóbede sáýir aıynda aýa temperatýrasy orta eseppen +7+12 ℃ jyly bolady. Bul normadan +1+2 ℃ (norma +5+11 ℃) joǵary. Sáýir aıynyń alǵashqy onkúndiginde kún jyly boldy. Alaıda ekinshi onkúndiginde aýa temperatýrasy túnde -3+2℃, kúndiz +3+8 ℃ bolady. Sol ekinshi onkúndiktiń ekinshi jartysynda kúndiz +15+20 gradýsqa deıin ysıdy. 

— Úshinshi onkúndikte aýa temperatýrasy túnde +3+8℃, keıde -2+3℃ bolady. Al kúndiz +17+22℃-tan +10+15 gradýsqa deıin aýytqyp turady. Oblystyq basym bóliginde jaýyn-shashyn qalypty bolsa, soltústiginde normadan kóp túsedi dep boljanyp otyr. Aıdyń ortasynda jańbyr, jylbysqy qar jaýyp, úshinshi onkúndiktiń basynda jáne sońynda jańbyr jaýady. Úshinshi onkúndiktiń basynda naızaǵaı oınap, ortasynda tuman túsýi yqtımal, — dedi «Qazgıdromet» RMK AOF ınjener-sınoptıgi Natalıa Snıgıreva.

Aqtóbe qalasynda jylý maýsymy dál qaı ýaqytqa deıin sozylatyny belgisiz. Ákimdik osy jáne kelesi aptada kún sýyq bolady dep otyr. 

— Aqtóbe oblysynda jylý maýsymyn ótkizý erejesine saı túnde aýa temperatýrasy ortasha +10 °S bolsa jáne bul 5 táýlik boıy saqtalsa, kún kúrt jylynyp ketse qala ákiminiń qaýlysy shyǵarylady. Sol kezde jylytý maýsymy aıaqtalady. Ázirge osy jáne kelesi apta kún sýyq bolýy múmkin dep boljanyp otyr- dep habarlady Aqtóbe qalasy ákiminiń baspasóz qyzmeti.

Eske salsaq, buǵan deıin Qostanaıda jylytý maýsymynyń merzimi ózgerýi múmkin ekeni jazyldy.