Aqtóbede orys mektepterine sabaq beretin muǵalim tapshy
AQTÓBE. QazAqparat – Aqtóbe oblysyndaǵy mektepterge 265 muǵalim jetpeıdi. Kóbine orys mektepterine sabaq beretin kadr tapshy, dep habarlaıdy QazAqparat tilshisi.
Búgin Óńirlik kommýnıkatsııalar qyzmetinde oblystyq bilim bóliminiń basshysy Lázzat Orazbaeva baspasóz máslıhatyn ótkizdi. Aqtóbe oblysy boıynsha bıyl 19,5 myń bala 1 synypqa barady. Olardyń 13 myńnan astamy qujattaryn tapsyryp, mektep jandarynan ashylǵan tegin daıyndyqqa barýǵa múmkindik aldy.
«Qazir oblysta 21 mekteptiń qurylysy júrip jatyr. Onyń 10-y oblystyq, 11-i respýblıkalyq bıýdjetten qarjylandyrylyp jatyr. Osy oqý jylynda 15 mektep paıdalýǵa beriledi. Mektep qurylysy óńirdegi úsh apatty jáne jeti úsh aýysymdy bilim ordasynyń máselesin sheshýge múmkindik beredi. Negizi oblysta 13 úsh aýysymda mektep bar», - dedi oblystyq bilim basqarmasynyń basshysy Lázzat Orazbaeva.
Aıta keteıik, Aqtóbe oblysy boıynsha 4, 9 jáne 10 synyp oqýlyqtary úshin bıýdjetten 1,9 mıllıard teńgeden astam qarjy bólindi. Bıyl óńirde oqýlyq tapshylysy máselesi týyndamaýy tıis. Degenmen qosymsha dápterlerdi jáne mektep aldy daıarlyq tobynyń oqýlyǵyn ata-analar ózderi satyp alady.
Baspasóz máslıhatynda kadr tapshylyǵy máselesi de aıtyldy. Qazir oblysta 265 muǵalimniń orny bos tur. Kóbine orys tilinde bilim beretin mektepterde kadr tapshy.
«Orys tilindegi mektepterde bastaýysh klass muǵalimi jetispeıdi. Bizde pedagogıkalyq kolledj ben joǵary oqý oryndary osy mamandyq boıynsha kadr daıyndaıdy, biraq bul salany tańdaıtyndar joq. Qazir orys klastaryna matematıka, fızıka, hımııa, geografııa, orys tili men ádebıetine oblys ákiminiń de granty taǵaıyndaldy. Biraq talapker joq, nıet bildirgender az. Problemany sheshý úshin balalardy mektepten daıyndaımyz. Máselen, pedagog bolamyn degen balalardy 7 klastan bastap tárbıeleımiz», - dedi oblystyq bilim basqarmasynyń basshysy Lázzat Orazbaeva.
Ázirge orys synyptaryna sabaq berip júrgen zeınetkerler sol kúıi jumysyn jalǵastyrady. Ári Túrkistan, Nur-Sultan, Almaty sekildi birneshe qaladan kelgen kadrlar qyrkúıekte jumysqa kirisedi.
