Aqtóbede órtengen avtobýs: Aman qalǵandarǵa kómek kórsetilip jatyr
AQTÓBE. QazAqparat - Aqtóbede jolaýshylar avtobýsyndaǵy órtten aman qalǵan adamdarǵa aýdandyq aýrýhana dárigerleri kómek kórsetip jatyr, dep habarlaıdy QazAqparat tilshisi.
Aqtóbedegi Yrǵyz aýdanynyń mańynda jolaýshylar avtobýsy órtenip ketip, aldyn ala málimet boıynsha 52 adam mert boldy. Bul týraly buǵan deıin habarlaǵan bolatynbyz. Atalǵan tótenshe oqıǵadan 5 adam aman qalyp, olarǵa medıtsınalyq, psıhologııalyq kómek kórsetilip jatyr.
«Oqıǵa Yrǵyz aýdanynyń ortalyǵynan 120-130 shaqyrym qashyqtyqta boldy. Qalybaı aýylynda medıtsınalyq qutqarý beketi jumys istep jatyr. Al aýdandyq aýrýhanadan arnaıy top jiberildi. Quramynda 6 maman bar. Onyń ishinde reanımatolog, anestezıolog bar. Barlyq kómek oqıǵa ornynda jasalyp jatyr. Aýdandyq aýrýhanaǵa kúıik shalǵandar jetkizilgen joq», - dedi Yrǵyz aýdandyq aýrýhanasynyń bas dárigeri Jasqaırat Súleımenov.
Aıta keteıik, osy oqıǵaǵa baılanysty Aqtóbe oblystyq tótenshe jaǵdaılar departamenti jedel jelini iske qosty. Aqtóbe oblysy ákiminiń orynbasary Serik Tólenbergenov te oqıǵa ornyna barady. TJD baspasóz qyzmeti oqıǵanyń mán-jaıy jedel shtabtyń jumysynan soń anyqtalatynyn jetkizdi.
