Aqtóbede órt sóndirýshiler jylytý maýsymynyń aldynda jataqhanalardy tekserdi
AQTÓBE. KAZINFORM — Bıyl jataqhanalarda eki órt bolyp, eki adam qaza tapty. Órt sóndirýshiler búgin tekserýge polıtsııa, gaz, elektr energııasy, jergilikti ákimdik qyzmetkerlerimen birge shyqty.
Aqtóbe qalasy aýmaǵynda 40-qa jýyq jataqhana bar. Órt sóndirýshiler stýdentter jataqhanasyn jylyna bir ret tekserse, otbasylyq úlgidegi jataqhana turǵyndaryna tek aqparattyq habarlama taratady.
— 21-30 qyrkúıek aralyǵynda «Jataqhana» profılaktıkalyq aktsııasy ótip jatyr. Sebebi jyl basynan beri jataqhanada 2 órt tirkelip, eki adam qaza tapty. Oblys boıynsha jalpy 364 órt oqıǵasy tirkelgen. Shyǵyn 150 mln teńgege jýyqtaıdy. Órt kezinde 9 adam qaza tapty, 8 adamdy kúıik shaldy, — dedi Aqtóbe oblystyq TJD bastyǵynyń orynbasary Aslan Arzymbetov. Onyń aıtýynsha, órttiń kóbi elektr jelisiniń qysqa tuıyqtalýynan, adamdardyń salǵyrttyǵynan bolady.
Aqtóbe qalasy Maresev kóshesindegi № 82 jataqhana byltyr apatty dep tanyldy. Aqpan aıynda elektr jelisinen aqaý shyǵyp, órtendi. Sodan keıin symdy qaıta jalǵaǵanymen, asa úlken ózgeris bolmady. Jataqhananyń elektr togy kez kelgen sátte úzilip, órt shyǵýy múmkin.
— Shaǵyn otbasyǵa arnalǵan jataqhananyń jaǵdaıy óte nashar. Elektr togy arnaıy qorapta emes, syrtyna shyǵyp tur. Keıbiri apatty jaǵdaı týdyrady. Úı apatty dep tanylǵanyn eskersek, munda jóndeý júrgizilmeıdi. Ákimdik turǵyndardy kezekpen jańa úıge kóshirýi kerek. Byltyr órt boldy, eshteńe de ózgermegen, — dedi Aslan Arzymbetov.
Aıta keteıik, bıyl mamyr aıynda Aqtóbede shaǵyn otbasyǵa arnalǵan jataqhananyń shatyry da órtenip ketti.
