Aqtóbede órt sóndirýshiler janyp jatqan qurylystan 10 gaz ballonyn alyp shyqty
ASTANA. KAZINFORM — Aqtóbe qalasy, Almaty aýdany, Aqtan Kereuly kóshesinde ornalasqan jeke turǵyn úı aýmaǵyndaǵy sharýashylyq qurylysta órt shyqty.
Oqıǵa ornyna TJM kúshteri jedel jetti. Órtti sóndirý barysynda órt sóndirýshiler yqtımal aýyr saldardyń aldyn alý úshin úılesimdi jáne jedel jumys júrgizdi. Jaqyn mańda ornalasqan metall konteınerden kólemi 30 jáne 60 lıtrlik 10 gaz ballony shyǵaryldy.
Qutqarýshylardyń kásibı áreketteri órtti tolyq sóndirýge múmkindik berdi. Zardap shekkender joq. Órttiń shyǵý sebepteri anyqtalyp jatyr.
Tótenshe jaǵdaılar mınıstrligi órt qaýipsizdigi erejelerin saqtaý jáne sharýashylyq qurylystar men gaz jabdyqtarynyń jaǵdaıyn ýaqtyly baqylap otyrý qajettigin eskertedi.
Aıta ketelik Astanada 10 qabatty úıde órt shyqty, balalar qutqarylǵan edi.
